KE: Problem borxhi dhe defiçiti

“Situata ekonomike në Shqipëri është pozitive kur shohim tendencën makro-ekonomike. Parashikimet për të ardhmen favorizojnë ruajtjen e një performance pozitive për periudhën 2012-2014. Konsumi dhe investimet private pritet të rriten dhe sigurisht janë marrë masa për të nxitur në këtë drejtim”, u shpreh Mimoza Halimi, ambasadore e Shqipërisë pranë BE-së.

Megjithatë, Vasilis Marangos, shefi i njesise per Shqiperine ne Komisionin Europian, u shpreh me doza të qarta skepticizmi: “Ekonomia vijon të shfaqë disa shenja dobësie. Mendoj se është shumë e rëndësishme të ruhet kuadri makro-ekonomik, në veçanti mbajtja nën kontroll e nivelit të borxhit publik dhe ajo e defiçitit. Aktualisht Banka Botërore po përpiqet të ndihmojë vendin që të ruajë të njëjtin nivel, për ta mbrojtur nga pasojat negative, si nga ato të jashtmet njësoj edhe nga dobësitë e brendshme. E njëra prej këtyre dobësive është papunësia e lartë; një tjetër dobësi është mungesa e reformave strukturore, problemet e disahershme me zbatueshmërinë e kontratave; disa dobësi në kuadrin e të drejtave të pronës. Një tjetër element që dua ta shtoj kur flasim për ekonominë është ndikimi i mundshëm mbi ekonominë i situatës politike që përmendëm më parë”.

Përveç pjesës politike dhe ekonomike, gjatë takimit përgatitor për Komitetin ndërparlamentar me Shqipërinë, Maragos renditi edhe arritjet pozitive apo ngecjet në kushtet e tjera të paplotësuara ende nga vendi, pjesë e 12 kritereve të famshme.

“Mund t’iu citoj si shembull bashkëpunimin shumë të mirë mes Avokatit të Popullit, i cili është një kampion i të drejtave të njeriut, përfshirë dhe të drejtat e të burgosurve, me Policinë e Shtetit, e cila ka krijuar një sistem shumë të mirë ndjekjeje të rekomandimeve nga Avokati i Popullit. Diçka e ngjashme u ngrit edhe me burgjet, por atje gjërat kanë ecur më ngadalë. Gjithsesi, ka probleme me zbatimin, përshembull në fushën e personave më aftësi të kufizuara. Nevojiten ende përpjekje në këtë fushë si dhe investim nga ana e autoriteteve. Një tjetër fushë shumë e ndjeshme ku nuk kemi parë të bëhet shumë është fusha e integrimit të romëve”, shtoi Marangos.

Megjithë punën e bërë që prej raport progresit të fundit, e kur ka mbetur pak kohë deri në raportin e radhës, Shqipëria rezulton të ketë përmbushur për momentin vetëm një kriter e gjysëm, nga 12 të përcaktuara që në nëntor të vitit 2010.

Top Channel