Maqedoni, shqiptarëve iu mohohet festa

Kështu thuhet në reagimin e Partisë Demokratike Shqiptare, e cila dënoi ashpër mbivotimin e shqiptarëve nga deputetët maqedonas, të cilët një ditë më parë votuan kundër propozimit të kësaj partie, që 28 Nëntori të shpallet festë zyrtare në Maqedoni.

Sipas PDSH-së Marrëveshja e Ohrit që mbështetet nga BDI-ja nuk parandalon majorizimin e shqiptarëve.

Bekim Fazliu, deputet i PDSH-së:

“Habit edhe hipokrizia e BDI-së sepse nga një anë glorifikojnë Marrëveshjen e Ohrit në ndërkohë që ajo marrëveshje u pamundëson shqiptarëve realizimin e aspiratave të tyre. Kërkojnë nga ne të sigurojmë shumicën dhe harrojnë se ata janë në koalicion me VMRO-DPMNE-në dhe legjitimitetin që kanë nga shqiptarët e shfrytëzojnë për të fshehur krimet që bëhen ndaj tyre. Vrapojnë të bëhen pjesë e amandamenteve të VMRO-së  dhe nuk deytorojnë VMRO-në të përkrah një ligj që është në të mirë të votuesve shqiptarë”.

Nga partia e Ali Ahmetit-BDI, thanë se partia e Thacit nuk është e sinqertë në kërkesën e saj, pasi PDSH, festën e flamurit ka mundur ta zyrtarizojë që në vitin 2007 kur ishte në pushtet, por një gjë të tillë nuk e bëri.

Talat Xhaferi, deputet i BDI-së:

“Fakti që ata nuk kanë konsultuar askënd për propozim ligjin në fjalë tregon për hiprokrizin e tyre për aspektin që me debatin nuk kanë deshtë që realisht të zgjidhin problemin që 28 Nëntori të jetë festë për shqiptarët në Maqedoni, por kanë dasht të bëjnë debatin e djeshëm që e kanë bërë dhe faktikisht sot të flasin për hipokrizi të BDI-së. Kjo nuk mban”.

Deputetët maqedonas të hënën një zëri refuzuan propozimin e PDSH-së që 28 Nëntori të shpallet festë për shqiptarët në Maqedoni.

Top Channel