Rriten kostot e borxhit
18/02/2012 00:00
Inflacioni në pikën më të ulët! Shkon në 2.1% dhe tregon rënie të fortë të konsumit nga popullata
08/05 19:55
Në shtator të vitit të kaluar, borxhi i jashtëm i Shqipërisë ceku për herë të parë shifrën 2 miliardë euro.
Të dhënat zyrtare të qeverisë tregojnë se më shumë se gjysma e tij është marrë pas vitit 2007, sidomos në periudhën 2008-2009. Ndryshe nga kreditë e para të zhvillimit, që janë marrë nga donatorët me interesa të buta, borxhet e fundit janë kryesisht kredi tregtare, me interesa tregu dhe afat shlyerje më të ulët.
Për pasojë buxhetit tani i duhet të bëjë llogaritë me shlyerjen e tyre. Parashikimet zyrtare të qeverisë tregojne ripagesat e borxhit në vite ose thënë ndryshe programin e shlyerjes së tij. Vitin që lamë pas, qeveria shpenzoi 0.6 për qind të Prodhimit Kombëtar për shlyerje borxhi.
Por në tre vitet e ardhshme, shuma do të rritet fort duke arritur në 1.3 për qind të Prodhimit Kombëtar në 2014-ën ose nga 76 milionë dollarë që është aktualisht në gati 200 milionë dollarë pas dy vitesh. Dhe këtu përfshihet vetëm principali, pa interesin që qeveria paguan për borxhin.
Nëse i shtohen edhe interesat, atëherë në 2014, buxheti i shtetit do të japë, sipas parashikimeve të vetë qeverisë, 756 milionë dollarë ose 4.9 për qind të Prodhimit Kombëtar për shërbyer borxhin publik. Kjo shifër është më e madhe se sa gjithë investimet publike të parashikuara në atë vit dhe e barabartë me totalin e pagave që mbajnë në këmbë gjithë administratën. Shqipëria ka një buxhet të vogël, për shkak të taksave të ulëta, por edhe evazionit të lartë. Për pasojë pagesat në rritje për borxhin janë një test jo i vogël për buxhetin. Aq më tepër tani, që qeveria është e detyruar të kufizojë shpenzimet për të mos lejuar shthurjen e financave publike.
Top Channel
