Senati i Australisë ka aprovuar një ligj kundër ndotjes së ambjentit, pas vitesh të tëra beteje politike.
Ligji në fjalë, i quajtur Akti për Energjinë e Pastër, do të detyrojë 500 kompani që ndotin ambjentin të paguajnë një taksë për emetimet e karbonit, duke filluar nga 1 korriku i vitit të ardhshëm.
Votimi në Senat përbën një fitore për kryeministren Julia Gillard, e cila e kishte mbështetur fuqishëm ligjin në fjalë.
Skema është mbështetur edhe nga ambjentalistët, por është kundërshtuar në masë të gjerë nga opinioni publik.
Partitë e opozitës kanë argumentuar se taksa do të shkaktojë humbje të vendeve të punës dhe do të rrisë koston e jetesës.
Liderët e partive opozitare kanë premtuar se nëse fitojnë zgjedhjet e ardhshme, të parashikuara për në vitin 2013, do ta rishikojnë ligjin.
Drafti kaloi votimin fillimisht në dhomën e ulët muajin e kaluar, me 74 vota pro kundrejt 72 kundër. Edhe në Senat diferenca ishte e ngushtë, 36 vota pro dhe 32 kundër, me qeverinë që i kishte varur shpresat tek të Gjelbërit.
Zonja Gillard deklaroi në një konferencë për shtyp se votimi ishte një fitore për ata që kërkojnë fat dhe e ndërtojnë rrugën e tyre duke punuar në sektorin e energjisë së pastër.
“Sot ne kemi bërë historinë. Pas shumë vitesh të mbushura me debate dhe ndarje, kombi ynë e kreu detyrën”, u shpreh Gillard.
Qeveria australiane ka vendosur cmimin fillestar 23.80 dollarë për një ton karbon të emetuar, shifër kjo shumë më e lartë se në vendet e BE ku cmimi varion mes 8 dhe 12 dollarë për ton.
Top Channel