Vizat, Fajon: Kosova duhet të presë edhe dy vite

24/10/2011 00:00

Raportuesja e Parlamentit Evropian për çështjet e vizave, Tanja Fajon ka
deklaruar se Kosova duhet të presë së paku edhe dy vite për
liberalizimin e vizave.

“Do të duhen edhe dy vite derisa Kosova të fitojë regjimin pa viza për në shtetet e BE-së. Nga Prishtina do të kërkohet që t`i plotësojë kushtet teknike”, tha Fajon, bën të ditur Kosovapress.

Deklarata e raportueses evropiane, Tanja Fajon, vjen pas paralajmërimit të Komisionit Evropian që dialogu për liberalizimin e vizave mes Kosovës dhe Komisionit Evropian do të nisë në fund të këtij viti.

Malmstrom: Nuk do ta lëmë jashtë Kosovën

Komisionerja evropiane për Cështjet e Brendshme, Cecilia Malmstrom ka deklaruar se BE nuk do ta lërë Kosovën që të izolohet.

Duke folur në një seminar mbi përvojat me liberalizimin e vizave, Malmstrom ka nënvizuar se Kosova është vendi i vetëm ballkanas që përballet me këtë regjim.

“Kosova nuk do të lihet si një ishull i izoluar, prandaj me Kosovën në dhjetor do të nisë dialogu për liberalizimin e vizave”, ka deklaruar Malmstrom.

Komisionerja është shprehur se pala kosovare nuk i ka plotësuar ende të gjitha kushtet e nevojshme, por ka nënvizuar se në këtë drejtim po bëhet progres i ndjeshëm.

“Në dhjetor do të marrim përgjigjet për listën e pyetjeve të cilat na shqetësojnë dhe shpresoj se para festave të fundvitit do të kemi mundësinë që me Kosovën të nisim dialogun për vizat”, ka shtuar Malmstrom.

Në raport-progresin e publikuar më 12 tetor, Komisioni Evropian sugjeronte nisjen e bisedimeve për liberalizimin e vizave me Kosovën brenda vitit.

Nga ana e saj, qeveria Thaci
është shprehur e gatshme për përmbushjen e kushteve të parashtruara nga
Brukseli, duke premtuar se do t’i realizojë ato në një kohë rekord.

Një nga kërkesat e paraqitura në progres-raport për liberalizimin e
vizave është zhbllokimi i situatës në veri, për të cilën Brukseli ka
kërkuar një strategji gjithëpërfshirëse.

Top Channel