Presidenti francez Nicolas Sarkozy e ka përshkruar lindjen e vajzës së tij si “një gëzim të thellë”, por edhe “privat”.
Vajza, me bashkëshorten Carla Bruni, lindi natën e së mërkurës në një klinikë të Parisit.
Zoti Sarkozy mbërriti në klinikën “La Muette” disa orë pas lindjes, pasi kishte udhëtuar në Gjermani për bisedime mbi krizën e borxhit.
Presidenti francez ka edhe tre fëmijë të tjerë, tre djem, nga dy martesat e mëparshme të tij.
“Lindja e vajzës është një gëzim shumë i thellë, më i thellë se të tjerët sepse është një gëzim privat”, u shpreh Sarkozy.
Ai tha gjithashtu se si nëna ashtu edhe fëmija janë në gjendje të mirë shëndetësore dhe shtoi se emri i vogëlushes do të publikohet nga bashkëshortja.
Sarkozy e bëri deklaratën e tij gjatë një vizite në një impiant për përpunimin e mbetjeve në perëndim të Francës.
Fillimisht cifti presidencial kishte vendosur të mos e njoftonte publikisht lindjen e fëmijës, por Sarkozy reagoi ngrohtë kur punëtorët e impiantit i dhanë atij dhurata gjatë vizitës.
Atij iu dha një grykashkë, një libër për bashkëshorten dhe një lis i vogël për t’u mbjellë, bën të ditur agjencia e lajmeve “AFP”.
Top Channel