Gjeorgjia, Sarkozy paralajmëron Rusinë

Zoti Sarkozy tha se Rusia ishte një mik i rëndësishëm, por përpjekjet e saj për të frikësuar Gjeorgjinë janë të papranueshme.

Lideri francez u shpreh se Rusia duhet t’u përmbahet pikave të marrëveshjes për armëpushim të arritur në vitin 2008, ku ai dha kontributin e tij.

Duke folur në Sheshin e Lirisë, në Tbilisi, ai tha se Franca mbështet plotësisht sovranitetin, pavarësinë dhe integritetin territorial të Gjeorgjisë.

“Franca e sheh Rusinë si mikun e saj, si një partner strategjik. Por kërcënimet, frikësimi dhe tentativat për të destabilizuar vendin nuk ndihmojnë në rivendosjen e besimit”, deklaroi Sarkozy.

Shefi i pallatit Elize u shpreh se Gjeorgjia duhet të jetë në gjendje të shprehë aspiratat e saj për t’iu bashkuar NATO-s dhe BE-së, pavarësisht kundërshtimeve të Rusisë.

Gjeorgjia akuzon Rusinë se ka shkelur paktin e vitit 2008 duke mos tërhequr trupat e saj në pozicionet para luftës dhe duke “pushtuar” ish-republikat sovietike të Abkazisë dhe Osetisë së Jugut.

Rusia njohu pavarësinë e këtyre dy “republikave” në vitin 2008, pasi ka mbajtur në to trupa paqeruajtëse që prej fillimit të viteve ’90.

Top Channel