FFK nuk mbajti premtimin

Krerët e federatës thanë që vendimi është shtyrë për një datë të pacaktuar për shkak të paqartësisë së ofertave. Nënkryetari i FFK-së, Agim Ademi, në konferencën e sotme për shtyp shpjegon arsyet e shtyrjes së vendimit.

“Pasi shqyrtuam ofertat vumë re që kishte disa paqartësi dhe disa shtesa nga kompanitë në materialet e paraqitura. Kështu që do t’i thërrasim edhe një herë zyrtarët e klubeve që të vijnë dhe të shpallim fituesin”, tha Ademi.

Sidoqoftë, Ademi nuk ishte shumë i qartë se kush do të marrë vendimin në fund: “Klubet na kanë autorizuar ne që të japim verdiktin, por FFK e sheh më të arsyeshme që të marrë një vendim të përbashkët me klubet pasi të bisedojmë.”

Ai premtoi që nuk do të ketë manipulime sepse Federata ka zgjedhur rrugën më të mirë për shpalljen e fituesit: “Ne i kemi thirrur të gjithë për të diskutuar dhe mediat e kanë pasqyruar këtë.”

Ofertuesit më seriozë në këtë tender ishin: Digitalb me 80 mijë euro neto plus 50 mijë euro hapësirë reklamuese në këtë medium, Digiworks me 86 mijë euro, por me TVSH dhe KosovaPress me 77 mijë euro.

Sekretari i FFK-së, Herroll Salihu, në një prononcim tha se vendimi përfundimtar për fituesin do të merret këtë javë.

“Nëse klubet do të jenë të kënaqura nga një nga ofertat nuk besoj se do të zgjasë më shumë se një javë”, u shpreh Salihu.

Federatës në fund i mbetet rinegocimi me klubet kosovare që të shqyrtojnë ofertën më të leverdisshme.

Top Channel