Diktatori libian, Muammar Gaddafi, kërcënoi Europën me një valë të paprecedent emigrantësh dhe me rënien e Libisë në dorën e Al-Kaedës, nëse ai do të largohet nga pushteti me forcë.
”Zgjedhja është midis meje dhe Al-Kaedës. Nëse unë do të bie, pushtetin në vend do t’a marrin ekstremistët, ndërsa emigrantët do të përmbysin Europën. Regjimi në Libi vazhdon të jetë i sigurt dhe i qëndrueshëm”, tha Gaddafi, i intervistuar nga televizioni francez “France 24”.
”Forcat e mia janë përfshirë në një betejë kundër terroristëve. Në Bengazi, pasi qyteti ra në duart e këtyre rebelëve, popullsisë iu shpërndanë mitralozë dhe armë të tjera, por disa kanë reaguar dhe i kanë bllokuar këta kriminelë”, shtoi diktatori.
Ndërkohë, ndërsa dhjetëra të vdekur i janë shtuar sot bilancit tragjik të luftimeve në Libi, Sekretari i Përgjithshëm i NATO-s, Anders Fogh Rasmussen, kërcënoi Tripolin, duke thënë se aleanca nuk mund të qëndrojë gjatë të gjithë kohës duke parë.
Top Channel