Rama: Zgjedhjet lokale, s’ka kushte

“Falenderoj qytetarët që dolën të protestonin në Tiranë, Vlorë, Lezhë dhe Korcë. Askush nuk do të na ndalë në rrugën tonë”, ka deklaruar Rama.

Ai ka paralajmëruar se protestat kundër “regjimit të kusarisë” do të vazhdojnë të premten e ardhshme, me qytetarë që do të tubohen në njësi të ndryshme bashkiake të kryeqytetit.

Më pas, Rama ka akuzuar ministrin e Brendshëm Lulzim Basha, “i cili është përgjegjës për dalldisjen e gardës në protestën e 21 janarit dhe për mosdorëzimin e gardistëve që vranë protestuesit tek prokuroria”.

Duke iu kthyer situatës politike, kreu i PS ka nënvizuar ashtu si dhe ditë më parë se mbajtja e zgjedhjeve vendore të 8 majit është e pamundur.

“Në këto kushte që është vendi nuk mund të ketë zgjedhje të asnjëlloji”, ka pohuar Rama, i cili ka evidentuar edhe problemet në fjalë.

“Institucionet e pavarura ndodhen në një sulm që është i papranueshëm, ndërsa të gjitha hallkat e procesit zgjedhor janë të mangëta dhe për pasojë rezultati deformohet. Ndërkohë që kemi edhe probleme të tjera, si Policia e Shtetit që keqpërdoret dhe mbahet jashtë kornizës së ligjit”, ka nënvizuar Rama.

Por nga ana tjetër ai ka vlerësuar se situatën aktuale në të cilën ndodhet vendi e zgjidhin vetëm zgjedhjet e parakohshme.

“Për ne zgjedhjet e parakohshme janë një zgjidhje racionale dhe e plotë në rrugën e trajtimit të një krize që thellohet përditë dhe e paguajnë qytetarët”, është shprehur Rama, duke shtuar se për të mbajtur këtë proces, vendi nuk ka përse të presë dritën jeshile të ndërkombëtarëve.

“Në këtë situatë s’kemi pse presim që miqtë dhe partnerët tanë të na thonë të mbajmë zgjedhje të parakohshme. Ata kanë 20 vjet që asistojnë Shqipërinë, nuk kanë për detyrë të bëjnë opozitën dhe në një proces që po kalon Shqipëria ata po bëjnë më të mirën për të lehtësuar rrugën ku palët duhet të ecin për të kërkuar zgjidhjen”, ka shtuar Rama.

Ai ka shprehur edhe njëherë gatishmërinë e tij për dialog me mazhorancën, por është shprehur skeptik për një takim kokë më kokë me kryeministrin Berisha.

“Unë kam qenë, jam dhe do mbetem i bindur se dialogu është një mekanizëm i patjetërsueshëm në një proces politik. Madje, në një proces ku përfshihen etni të ndryshme dhe jo më në një proces ku përfshihen palë që përfaqësojnë pjesë të të njëjtit popull dhe që jetojnë në të njëjtin vend. Por, takim për takim dhe muhabet për muhabet mes meje dhe Saliut nuk do të ketë”, është shprehur Rama.

Top Channel