Meta: Montazhet mafioze do demontohen

Në një prononcim për mediat, Meta ka përdorur tone të ashpra edhe ndaj ish-vartësit të tij, Dritan Prifti, që publikoi videon e aferave.

“Edi Rama, tashmë kryetari i sektit të spiunëve të Shqipërisë, kjo fundërrinë e pashembullt morale e shoqërisë shqiptare, ky njeri që mohoi atësinë e të birit në gjyq, ky njeri që akuzoi babain e tij si babain e dajlit të tij, ky njeri i pander, i pafamilje, pa asnjë normë shoqërore dhe morale, synoi të bënte një puc përmes një përgjimi kriminal, të paligjshëm dhe të pashembullt, duke përdorur si dëshmitar një fundërrinë të paparë, që e kishte akuzuar Edi Ramën si një njeri që e kishte parë duke marrë kokainë në zyrën e kryetarit të bashkisë”, ka deklaruar Meta.

Ai është shprehur i bindur se “montazhi” i Edi Ramës do të dështojë. “U konfirmoj qytetarëve se montazhi i fëlliqur, se titrat e vendosura nga Edi Rama, se e gjithë kjo veprimtari kriminale do të demontohet në mënyrë spektakolare nga drejtësia”, ka pohuar Meta.

Duke njoftuar ngritjen e një grupi ekspertësh që do të hetojnë cështjen, Meta ka theksuar se pushteti “mafioz” i Ramës do të marrë fund në zgjedhjet e ardhshme lokale.

“Kam ngritur një grup juristësh që do të nisin punën dhe shqiptarët do të shohin se njeriu që do të vijë në pushtet përmes dhunës është një montazhues i fëlliqur, i marrë peng nga mafia dhe krimi, që në 8 maj do marrë verdiktin nga qytetarët si një fundërrinë morale dhe politike. Më 8 maj do të pastrohet qyteti i Tiranës nga një monstër”, ka shtuar Meta.

Top Channel