Rama: Qeveria, manipulim barbar trafikut

Në një prononcim për mediat, pas një takimi për cështjet ekonomike ku mbërriti me vonesë, Rama i ka cilësuar si “barbare” veprimet e qeverisë, që sipas tij kanë si qëllim dëmtimin e imazhit të bashkisë.

“Është e pashembullt që Policia e Shtetit të abuzojë në këtë mënyrë për një qëllim makabër, duke tensionuar qytetarët, për të krijuar një peshë faji mbi bashkinë. Kjo është një metodë e vjetër, por është nga format më të përcmuara. Është barbare, primitive, vullgare dhe kriminale që në një qytet evropian të ndodhë dicka e tillë në mënyrë të qëllimshme”, ka deklaruar Rama.

Sipas tij, situata në rrugët e kryeqytetit pas shiut të dendur ishte normalizuar, por me urdhër të kryeministrit trafiku është rënduar tejmase.

“Policia e Shtetit është një trupë e specializuar, në gjëndje të përballojë detyrat e saj dhe kurrë nuk ka ndodhur një trafik i tillë. Shiu ka pushuar, rrugët janë normalizuar dhe trafiku vazhdon”, ka pohuar Rama, i cili ka vijuar me akuzat ndaj kreut të qeverisë.

“Është Berisha që ka refuzuar cdo bashkëpunim për ta marrë bashkinë e Tiranës në funksion të punës së bërë me BERZH dhe ja ku u bindëm sot në një moment, që ndodhemi në një situatë që u tregon qytetarëve fytyrën e vërtetë të këtij pushteti, në përmasën e tij më të ulët morale”, është shprehur Rama.

Kryetari i opozitës ka akuzuar më tej se drejtuesit e qeverisë po e përdorin Policinë e Shtetit me qëllim që të mbajnë pushtetin e tyre, të cilit sipas tij s’po i mbajnë më gjunjët.

“Situata mban vulën e ministrit të Brendshëm dhe kryeministrit, që përdorin policinë për interesat e një pushteti që nuk i mbajnë më gjunjët”, ka shtuar Rama.

Top Channel