Sa herë që në Kosovë pritet të mbahen zgjedhjet, partitë politike janë ato që bëjnë lëvizjet më të mëdha. Aderimet e politikanëve, ikjet nga njëra në tjetrën parti, është diçka që ndodh në Kosovë që prej pasluftës.
Ditë më parë Aleanca Kosova e Re, që drejtohet nga Behxhet Pacolli, arriti që nën një çati t’i sjellë dy partitë e pensionistëve të Kosovës.
Ndërsa, të enjten në Vetëvendosje kaluan së fundmi 5 subjekte politike.
Në AAK shkuan edhe deputetët e pavarur nga legjislacioni i fundit, Driton Tali e Naim Rrustemi.
Kurse, lista më e përfolur “LDK–Ibrahim Rugova” të mërkurën nënshkroi koalicion parazgjedhor me AAK-në e Ramush Haradinajt, ndonëse më së shumti pritej që djali i Ibrahim Rugovës, Uka, të ishte në listën e ish partisë së të atit, në LDK.
Ndërsa, as në këtë të fundit nuk kanë munguar kalimet e personaliteteve të ndryshme. Madje, listave të partive politike si asnjëherë më parë u janë bashkuar edhe gazetarët.
As partia e Hashim Thaçit nuk ka heshtur kur bëhet fjalë për, siç thuhet, prurje të energjive të reja.
Pak a shumë, këto gjëra i dëgjojnë çdo ditë qytetarët e Kosovës. Në të tilla raste, në konferencat e partive politike zakonisht përdoret shprehja pothuajse e njëjtë: “Ne po fuqizohemi, në të mirë të Kosovës”.
Por, analisti politik Halil Matoshi nuk i beson kësaj retorike. Ai thotë se problem i kësaj është mosprofilizimi i partive politike.
“Nuk është krijuar e majta, e djathta, ose qendra. Programet e të gjitha partive janë të ngjashme dhe kalimet nga një bllok tek tjetri bëhen për të mbetur në skenën politike dhe jo për të fuqizuar shtetin dhe politikën”, deklaron Matoshi.
Sidoqoftë, e gjithë kjo që po ndodh në Kosovë ditëve të fundit mund të shpjegohet edhe me fjalorin e merkatos së futbollit.
Ndonëse afati kalimtar për futbollistët, por edhe i huazimeve, zakonisht ndodh pas përfundimit të çdo sezoni futbollistik, në politikën kosovare kalimet e politikanëve nga njëra në tjetrën parti ndodh sa herë që pritet të votohet.
Top Channel
