Biznesi, borxh 630 milionë USD shtetit

Shifra është bërë publike nga kryetari i Kontrolli të Lartë të Shtetit, Robert Çeku, i cili rekomandoi gjetjen e një zgjidhjeje të menjëhershme.

Në krah të Çekut qëndronte ministri i Financave, Ridvan Bode, të pranishëm në Komisionin parlamentar për Ekonominë dhe Financat për raportimin e buxhetit faktik 2009 dhe aktivitetin e KLSH-së.

Të dy krerët më të lartë të financave publike dhe aktivitetit ekonomik rakorduan të dhënat rreth buxhetit, sa u takon shpenzimeve, të ardhurave dhe deficitit buxhetor, kurse anëtarët e Komisionit të Ekonomisë, kryesisht deputetët socialistë, u fokusuan te problematika e borxhit dhe krizës ekonomike.

Për Robert Çekun, situata mbi detyrimet e papaguara nga biznesi për tatimet dhe doganat konsiderohet tepër serioze, që kërkon zgjidhje të fortë.

“Ju sugjerojmë gjetjen e një zgjidhjeje sa më optimale për gjendjen e detyrimeve debitore në fund të vitit 2009 në shumën e rreth 66 miliardë e 146 milionë lekëve (rreth 630 milionë dollarë), vlerë e cila për nga madhësia dhe problematika që mbart është shqetësim tepër serioz për ekonominë dhe vendin”, tha kreu i KLSH-së.

Çeku i rekomandoi ministrit të Financave, por edhe anëtarëve të komisionit, hartimin e një ligji të posaçëm për vjeljen e këtyre detyrimeve, ose identifikimin e tyre, një pjesë e të cilës pothuajse është zhdukur.

Për administratën tatimore, deklarata e kreut të KLSH-së është një ekzagjerim dhe nuk qëndron e vërtetë.

Të kontaktuar nga “Shqip”, zyrtarë të Drejtorisë së Përgjithshme thonë se shifra 630 milionë dollarë është e ekzagjeruar. Megjithatë, tatimet nuk japin sqarime më të hollësishme se si qëndron e vërteta pas këtyre shifrave alarmante.

Top Channel