Londër, arrestohet shqiptari

21/09/2010 09:30

Ka marrë fund arratia 13-vjecare e një shqiptari që fshihej në Londër pasi kërkohej të përfundojë dënimin e marrë për një vrasje dhe një tentativë vrasje. (UPDATE)

Skuadra e ekstradimeve në Scotland Yard ka ekzekutuar një fletë arresti ndërkombetar duke bërë të mundur arrestimin e Fadil Hoxhës pas një informacioni të dërguar nga Interpol Tirana për identitetin e rremë që perdorte në Angli.

Nga përmbajtja e fletë arrestit mësohet se 41-vjecari Hoxha kërkohet për plotësuar vitet e mbetura të burgut pasi është gjetur fajtor për vrasjen e Hysen Luzës dhe tentativën e vrasjes së Meliha Xhidikut ngjarje e ndodhur më 8 Tetor 1992.

Gjatë momentit të arrestimit në banesën e tij në zonën Enfield në veri të Londrës, Hoxha ka deklaruar se ai quhet Arben Hoxha dhe se nuk ishte ai personi të cilin kërkonin.

Gjykatës së ekstradimeve përfaqësuesja e shtetit shqiptar i tha se Fadil Hoxha fshiheh duke përdorur një identitet të rremë madje pavaresisht se ishte i arratisur nga një burg shqiptar kishte mundur të përfitonte nështetësi britanike.

Në seancën e ardhshme i takon palës mbrojtëse t’i argumentojë gjykatës se personi i arrestuar nuk është i kërkuari Fadil Hoxha, ndërkohë nuk bëhen të ditura provat e palës shqiptare që kanë bërë të mundur identifikimin e tij.

Fadil Hoxha do t’i zhvillojë procedurat e ekstradimit në paraburgimin e burgut të sigurisë së lartë Belmarsh, për vetë natyrën e krimeve të cilat ai kërkohet të ekstradohet.

Top Channel