Steinberg: Shqipëria të zgjidhë krizën

Në një intervistë për VOA, Steinberg ka thënë se Shtetet e Bashkuara i kanë mbështetur hapat që anëtarët e Parlamentit Europian kanë ndërmarrë për të lehtësuar një mirëkuptim mes palëve.

“Është një situatë e vështirë. Ne pranojmë se kryeministri është udhëheqësi legjitim i vendit dhe mendoj se duhet të shikojmë përpara por mendoj se ekzistojnë hapa që mund të bëhen për të ndihmuar në arritjen e pajtimit mes forcave politike në Shqipëri. Ne i kemi mbështetur mjaft përpjekjet që anëtarët e Parlamentit Europian kanë ndëamarrë për të lehtësuar një mirëkuptim mes palëve. Ne shpresojmë se të dyja palët do të tregojnë një farë elasticiteti, të lejojnë vendin të ecë përpara”, ka deklaruar Steinberg.

Ai ka theksuar se Shqipëria ndodhet përpara proceseve të rëndësishme dhe ka nënvizuar se për disa cështje është i domosdoshëm konsensusi mes palëve.

“Shqipëria është në prag të disa hapave që mund ta forcojnë të ardhmen e saj europiane krahas anëtarësimit në NATO. Siç e përmenda, kryeministri Berisha është udhëheqësi legjitim në Shqipëri, por mendoj se mund të ndërmarrim disa hapa përpara për të lejuar që të dyja palët të përpiqen të punojnë së bashku”, është shprehur Steinberg.

Ai ka shtuar se palët kanë nevojë për një shumicë për të miratuar disa ligje në parlament prandaj ky lloj të menduari që mban parasysh të ardhmen do t’i ndihmojë ata të ecin përpara në drejtimin ku të gjithë duan të shkojnë.

Top Channel