Edhe Bulku, pjesë e korit

E gjithë java para kësaj ndeshjeje është karakterizuar nga një optimizëm i theksuar i kuqezinjve, në lidhje me këtë përballje, ku prej tyre kërkohet vetëm fitorja, si alternativa e vetme që ka kjo kombëtare, për të mos ta konsideruar të dështuar këtë edicion të eliminatoreve të Botërorit 2010.

Por edhe ndjenja e hakmarrjes së asaj humbjeje të hidhur 0-2 në Budapest më 11 tetor 2008 i karikon kuqezinjtë, të cilët i shikojnë tri pikët si fondamentale. Pjesë e këtij “kori” është edhe për Ervin Bulku. Mesfushori shqiptar i Krivbasit e vlerëson kundërshtarin për paraqitjen që ka bërë në këto eliminatore, ndaj e di mirë se nuk do të jetë i lehtë realizimi i objektivit. “Futbolli është i paparashikueshëm”, shton Bulku, i cili garanton se kuqezinjtë janë përgatitur për të dhënë maksimumin: “Do të mundohemi të bëjmë më të mirën në fushën e lojës. Gjithsesi, ne pretendojmë të arrijmë realizimin e synimit që i kemi vënë vetes”.

28-vjeçari, i cili në 3 marsin e kaluar festoi datëlindjen e tij, konfirmon edhe një herë se direktivat e trajnerit Ari Han për lojtarët janë për përqendrim total te ndeshja e sotme. Vetëm pas këtij 90-minutëshi do të mendohet për ndeshjen e të mërkurës ndaj Danimarkës në Kopenhagën.

“Ndërsa për ndeshjen e dytë them se është e vështirë, shprehet Bulku. Jam i mendimit t’i marrim me radhë. Të mendojmë ndeshjen e parë, pastaj të dytën”.

Detyra e tij është të shkatërrojë aksionet e kundërshtarëve dhe të ndihmojë mbrojtjen. Meritën e dy golave të pësuar deri tani ia atribuon “ekipit, jo vetëm mbrojtjes”. Sipas tij, Shqipëria po mundohet të imitojë futbollin total: “Në fushë luajnë 11 veta, që duan të shënojnë dhe të mbrohen. Shpresoj që të vazhdojmë kështu deri në fund të eliminatoreve”, përfundon mesfushori i kuqezinjve.

Top Channel