Kuzhina molekulare

07/04/2017 00:00

Kuzhina molekulare me pjatat e saj të veçanta, ku përmbajtja dhe shija i nënshtrohen transformimeve fizike dhe kimike, po fiton gjithmonë e më shumë popullaritet mes japonezëve të vënë në kërkim të shijeve të reja.

Në rastin e kësaj kuzhine, shefat eksperimentojnë metoda të ndryshme për të shndërruar karakteristikat e përbërësve, duke ua ruajtur në të njëjtën kohë aromën.

Një restorant në Tokio, për shembull, shërben një pjatë të quajtur “vezë të nxehta pranverore”, e gatuar me tofu dhe kungull. Kungulli i shtrydhur përzihet me xhelatinë algash deti dhe laktat kalciumi. Pastaj ngrin që të mpikset dhe duket tamam si e verdhë veze.

Një tjetër pjatë mjaft e preferuar është “Puroja”, me bazë patatet e ziera dhe proshutën. Në fund spërkatet me fara susami dhe fara të zeza, e duket si puro e vërtetë.

“Nga pamja duket tjetër gjë dhe kjo e bën interesante. Edhe pse karakteristikat e elementëve përbërës kanë ndryshuar, shija origjinale ruhet deri në fund dhe kjo përbën një surprizë të këndshme”, tha njëri prej shefave të kuzhinës.

Shumë pjata të kuzhinës molekulare gatuhen në temperaturë të ulët për të shmangur dëmtimin e proteinave. Në këtë mënyrë tentohet të ruhet në maksimum jo vetëm shija, por edhe vlerat e tyre ushqyese.

Top Channel