Totozani: Reforma në drejtësi të garantojë të drejtat themelore

Edhe pse ka qëndruar jashtë shprehjes së mendimit lidhur me aktorët pengues të kësaj reforme, avokati Totozani ka theksuar se në gjithë historinë e shtetit tonë ekzekutivët e kanë tejkaluar kufirin që ka vendosur ligji dhe kjo i ka bërë ata shkelës të të drejtave të njeriut.

“Ekzekutivi dhe pushtetet e tjera duhet të jenë të kufizuara nga ligji, ky është përkufizimi i shtetit të së drejtës. Në historinë tonë 100-vjeçare si shtet, ekzekutivët e kemi pasur të vështirë t’i mbajmë brenda ligjit, ato e kanë tejkaluar këtë kufi. Nuk duhet ta tejkalojnë, sepse nëse një organ shtetëror kalon kufirin atëherë ai bëhet dhunues i ligjit. Për të mos lejuar këtë është pushteti gjyqësor. Reforma në drejtësi është jeta jonë e ardhshme”, ka deklaruar Totozani.

Sipas tij, pushteti gjyqësor duhet të jetë transparent, efiçent, i pavarur, i drejtpërdrejtë me qytetarët dhe i parashikueshëm.

Gjatë takimit me qytetarët të zhvilluar në vazhdën e turit që institucioni i Avokatit të Popullit ka marrë në gjithë vendin, në Korçë janë evidentuar problematika të fushave të gjera, me drejtësinë, rrugët, moszbatim vendimesh, etj.

Top Channel