Përmbytjet në Lezhë, dëme materiale të pakta

Burime nga Prefektura konfirmojnë se dëmet janë të pakta dhe problemi kryesor ka qenë lagjja “Besëlidhja”, e cila për disa orë me radhë pothuajse u bllokua totalisht, si pasojë e ujërave të shumta.

Kanalet e ujërave por edhe kolektorët kryesorë janë në nivele të larta të prurjeve, ndërsa Bordi i Kullimit infomon se hidrovorët janë në gjendje pune. Në lagjen “Skënderbe”, disa banesa të banorëve të komunitetit rom kanë pasur prani uji.

Një tjetër problematikë e shfaqur nga reshjet është edhe “Shëtitorja e Drinit”, e cila mesa duket do të jetë në fokus gjatë stinës me reshje, pasi në vende të ndryshme të saj ka pasur rrëshqitje të dherave në të dyja anët e shëtitores.

Kjo shëtitore, e cila ishte një investim shumë i rëndësishëm, duke i dhënë një tjetër hov zhvillimi dhe frekuentimi bregut të Drinit, ende nuk është marrë në dorëzim nga Bashkia Lezhë, pikërisht për këto problematika, të cilat kompromentojnë cilësinë e punimeve.

Ndërkohë, edhe pse niveli i lumit Drin është rritur ndjeshëm në krahasim me ditë më parë, deri më tani nuk ka shkaktuar përmbytje.

Top Channel