Rikthehet ferri në Aleppo, OKB ndalon karvanët e ndihmave

Sulmet nga ajri shkatërruan 18 nga 31 kamionë të mbushur me grurë, veshje dimri dhe ilaçe. Goditja ajrore erdhi pak orë, pasi ushtria njoftoi se armëpushimi i ndërmjetësuar nga Amerika dhe Rusia kishte përfunduar.

Uashingtoni tha se, nga ky moment do ta rishikojë perspektivën e bashkëpunimit me Moskën, ndërsa kryediplomati John Kerry i bëri thirrje kësaj të fundit të frenojë Bashar al-Assadin.

“Marrëveshjen nuk e bënë sirianët, marrëveshjen e bënë rusët. Ndaj ajo që ne duhet të shohim është se çfarë do të thonë tani rusët. E rëndësishme është që ata të kontrollojnë Assadin, që është lëshuar pa dallim në bombardime, duke përfshirë te shënjestrat e tij edhe autokolonat humanitare”, tha Kerry.

Zëdhënësi i Departamentit amerikan të Shtetit, John Kirby sqaroi se, si regjimi sirian, ashtu edhe Federata Ruse e dinin shumë mirë destinacionin e kamionëve me ndihma. “E megjithatë, – shtoi ai, – punonjësit e ndihmës u qëlluan dhe u vranë, ndërkohë që tentonin të lehtësonin sadopak situatën e rënduar të banorëve të zonës”.

Sipas Observatorit sirian për të Drejtat e Njeriut, me seli në Londër, sulmet ajrore mund të jenë ndërmarrë edhe nga avionë rusë. Nga sa pohon shefi i ndihmave në OKB, Stephen O’Brien, nëse goditja provohet të ketë qenë e qëllimshme, atëherë ajo mund të konsiderohet krim lufte.

Top Channel