Boshatiset qielli francez. Aviacioni në grevë, pezullohen qindra fluturime

“Ryanair” pezulloi 22 fluturime mbrëmjen e së mërkurës dhe 72 të tjera gjatë ditës së sotme. “Air Lingus” ka lënë gjithashtu në tokë disa prej avionëve të vet. Prej grevës janë prekur, sipas BBC-së, fluturime që ndjekin një itinerar të zakonshëm në hapësirën ajrore franceze.

Pasagjerët janë këshilluar të kontrollojnë paraprakisht situatën e avionëve që duhet të marrin. Gjërat ndryshojnë kaq shpejt, sa “British Airways” nuk e ka bërë publik numrin e fluturimeve të saj të prekura nga ky veprim.

“Fatkeqësisht, – thuhet në deklaratën e lëshuar prej kompanisë ajrore britanike, – nëse greva vazhdon, atëherë do të na duhet të anulojmë disa fluturime, ndërsa të tjerat mund të kenë vonesa apo vështirësi të ndryshme”.

Për të ndihmuar klientët e prekur nga kjo situatë, kompania shprehet e gatshme të fusë në përdorim avionë më të mëdhenj. “Ryanair” paralajmëron edhe ai për vonesa. Kjo grevë e francezëve do të prekë me mijëra klientë europianë, ndërsa kërcënon t’i zhysë sërish në kaos përpjekjet e tyre për të udhëtuar me avionë.

“Është koha që Komisioni Europian të marrë masa, në mënyrë që të parandalohen lëvizje të tilla të përsëritura, që ndikojnë në planet e miliona europianëve dhe të afërmve të tyre”, thanë drejtues të linjës ajrore “loë cost”.

Arsyeja e grevës është pakënaqësia me ndryshimet e propozuara në ligjin e punës, që lehtësojnë marrjen në punë, por edhe pezullimin e punonjësve.

Top Channel