Proçedim penal për Dashnor Alikon

Sipas policisë, ndaj Alikos janë kryer veprimet proçedurale dhe materialet i kanë kaluar Prokurorisë për Krime të Rënda në Tiranë, si i dyshuar për një sërë veprash penale.

Mes tyre janë: “vrasje në rrethana cilësuese mbetur në tentativë”, “organizim dhe drejtim të organizatave kriminale”, “moskallëzim i krimit”, “përkrahje të autorit të krimit” dhe “forma të veçanta të bashkëpunimit”.

Lazarat, RENEA gjen snajperin e 1998

Forcat RENEA kanë gjetur snajperin e tyre në Lazarat, i cili,
gjatë një operacioni shumë të vështirë të zhvilluar në Shtator të vitit
1998, pas një shkëmbim-zjarri, kishte mbetur në fshat. Gjatë atij operacioni mbetën të plagosur disa punonjës policie, mes tyre dhe Drejtori aktual i Policisë së Shtetit, Artan Didi.

Forcat RENEA gjetën pjesë të këtij snajperi në disa ambiente të ndryshme, si tytën e prerë, këmbalecin, shulin, ku është i stampuar dhe numri i serisë së snajperit, krëhërin me 10 fishekë, qytën dhe rripin e snajperit, që u përkiste këtyre forcave.

Më herët gjatë ditës, dy persona të tjerë u arrestuan, me akuzën e prodhimit dhe shitjes së narkotikëve, kultivim të narkotikëve dhe mbajtjen pa leje të armëve e municionit luftarak. Ata janë Maridion Selimi, 25 vjeç, dhe Lutfi Trako, 46 vjeç.

Deri në këto momente janë sekuestruar sasi të konsiderueshme kanabisi, ku vetëm në një banesë u gjetën mbi 1,5 ton, ndërkohë gjatë kontrolleve në një tunel janë gjetur sasi të mëdha boçesh bimë narkotike.

Në total janë 47,5 ton hashash dhe mbi 150 mijë rrënjë kanabis, 5 laboratorë dhe 236 armë të llojeve të ndryshme, deri edhe granatahedhës, anti-tank dhe snajper.

Top Channel