Tërheqje pas 5 orësh dhune. Protestuesit tentuan të hyjnë në Kryeministri. Zjarr dhe gaz lotsjellës

16/02/2019 19:30

Nisi me lule, por vazhdoi me akte dhune, zjarr dhe gaz lotsjellës protesta e opozitës në bulevardin “Dëshmorët e Kombit”.

Protesta ishte një marshim i qetë deri në momentin që kordoni i policisë u ça dhe dhjetra protestues filluan të shkatërronin skelën në derën kryesore të Kryeministrisë.

Një kordon i çarë për të cilin kreu i demokratëve, Lulzim Basha e konsideroi një provokim të ardhur nga kryeministri Edi Rama, që, sipas tij, kishte dhënë urdhra politikë policisë.

Pas përpjekjes së parë për të shkatërruar instalacionin e Kryeministrisë dhe skelën, policia përdori ujë dhe gaz lotsjellës duke i zmbrapsur protestuesit.

Për këtë përdorim të gazit lotjsjellës krerët e opozitës akuzuan policinë.

Kjo tablo, ku policia teksa tërhiqej lejonte protestuesit të çanin rrethimin dhe të shkatërronin skelën dhe më pas t’i largonte ata me gaz lotsjellës, ndodhi disa herë në çdo 20 minuta gjatë protestës. Policia i kërkoi gjatë gjithë kohës protestuesve që të ruanin qetesinë dhe të mos e shkatërronin godinën e Kryeministrisë, por edhe kjo përpjekje e policisë për të ndalur protesuesit ra, pasi një prej tyre u ngjit në shtyllë duke e hequr megafonin që përcillte mesazhin e saj.

Gjatë gjithë kohës, protestuesit kërkuan të thyenin derën e godinës së Kryeministrisë, por nuk kanë mundur dot, për shkak se dera ishte e blinduar dhe ruhej nga forca speciale nga brenda saj, të cilët nuk e lejuan në asnjë mënyrë hyrjen e protestuesve.

Gjatë gjithë kësaj kohe, kreu demokrat Lulzim Basha, por jo vetëm, deklaronte se e gjithë protesta është lënë në dorë të qytetarëve dhe janë ata që do të vendosnin sa do të zgjasë dhe mënyrën e saj. Është ish-kryeministri Sali Berisha që në fjalën e tij herë pas here shprehte se kryeministrit Rama i lihet kohë deri në mbrëmje të largohet nga posti.

Monika Kryemadhi tha se në protestë ishte si qytetare.

Por, ndërsa protesta ishte njoftuar pa afat, ajo u mbyll kur sapo përfundoi ora e pestë e dhunës.

Top Channel