Prokuroria e Krimeve të Rënda do të hetojë vetëm grabitjen e parave në aeroportin e Rinasit.
Për pesë të arrestuarit, shumica e të cilëve punonjës të shoqërisë së sigurisë në aeroport, ICTC, Prokuroria e Krimeve të Rënda ka shpallur moskompetencë duke ja kthyer për hetime të mëtejshme Prokurorisë së Krujës.
Kjo prokurori shprehet se nuk mund t’i hetojë ish-punonjësit Bledar Blloshmi, Arben Karafili, Vangjel Nikolla, Fadil Jonuzaj dhe Kujtim Picarin për shpërdorim detyre, pasi kjo vepër nuk është kompetncë e saj.
Për këta persona nuk u konkluduan të dhëna që do t’i implikonin në pjesëmarrje të strukturuar kriminal. Por ndërkohë situata e të vetmeve të arrestuar për Rinasin vijon të jetë e paqartë juridikisht dhe duket se gjykatat po lozin ping pong.
Për shkak të një vendimi të Apelit për Krime të Rënda që prishi masën e shkallës së parë për Krimet e Rënda, avokatët ju drejtuan të njëjtës gjykatë për lirimin e menjëhershëm të klientëve, kërkesë që u rrëzua me argumentin se më herët kishte shpallur Gjykata e Krujës një masë arresti me burg.
Aktualisht, dosja mbahet në pritje të Gjykatës së Lartë, e cila do të shprehet përfundimisht nëse ka apo jo ndaj tyre një masë sigurie për shkak të pretendimit të mbrojtjes që këmbëngul se vendimi i Krujës është zhbërë nga Krimet e Rënda.
Ndërkohë gjatë kësaj të hëne avokatët ripërsëritën kërkesën për lirimin e menjëhershëm të klientëve në apel, kërkesë që u rrëzua sërish.
“Do të ndjekim rrugën ligjore sepse Prokuroria këtë veprim duhet ta kryente që në datën 2 gusht”, shprehet avokati Genc Gjokutaj.
Megjithë sekuestrot e dhjetëra kamerave si edhe të dokumentacionit, Prokuroria nuk ka ende të dhëna konkrete se cilët janë njerëzit që me maska grabiten brenda në aeroport shumën e konsiderueshme.
Top Channel