Teknologjia në zgjedhje

Sekretari për çështjet zgjedhore në PS, Damian Gjiknuri thotë për Top Channel se ka disponuar muaj më parë të dhënat e të njëjtave kontrata me kompaninë spanjolle “Indra”, të cilat po nënshkruhen vetëm tani nga Komisioni Qëndror i Zgjedhjeve.

“KQZ i ka pasur dokumentat gati që në tetor 2012 dhe vetëm në janar 2013 ato u hodhën në tenderim. Dikush duhet të mbajë përgjegjësi për këtë dhe përgjegjësi ka qeveria, që e zvarriti këtë proçes duke e çuar në kufijtë ekstremë kohorë”, deklaron Gjiknuri.

Përveç teknologjisë, shqetësim madhor, thotë Gjiknuri, shfaqin edhe listat e zgjedhësve. “Ministria e Brendshme po e bën këtë me shumë vonesë dhe ka rreth 50 mijë të dhëna të dyshuara se janë të dubluara. Ministria e ka detyrim ligjor që të bëjë kontrollin me kartat e identitetit dhe më pas të bëjë identifikimin në terren”, nënvizon Gjiknuri.

Sekretari për çështjet zgjedhore në partinë më të madhe të opozitës thotë se proçesi zgjedhor do të shpëtohej në rast se institucioni më i lartë zgjedhor merr parasysh edhe thirrjet e ndërkombëtarëve dhe raporteve të OSBE dhe NDI për të fituar pavarësinë nga ndikimi i pushtetit dhe të zbatojë ligjin.

“Ndryshe, sërish KQZ do jetë një pikë nevralgjike e zgjedhjeve. Por ne garantojmë publikun se ecuria e tyre do të varet nga pjesëmarrja e tyre dhe puna e komisioneve dhe PS po punon për këtë përditë”, shton Gjiknuri.

Top Channel