Dardanët nuk arrijnë të thyejnë mbrojtjen kundërshtare, edhe pse krijojnë disa raste të mira shënimi. Kartoni i kuq i Veldin Hoxhës e vështirëson misionin e skuadrës së Franco Fodës, që tashmë do të kërkojë vendin e dytë në transfertën ndaj Irlandës.
Kosova nuk shkoi më shumë se një barazim pa gola ndaj Izraelit në stadiumin “Fadil Vokrri”, në ndeshjen e vlefshme për Grupin B3 të Ligës së Kombeve. Dardanët e dominuan takimin dhe krijuan disa mundësi të mira shënimi, por nuk arritën të gjenin rrugën e rrjetës, duke marrë vetëm një pikë në një përballje ku fitorja ishte objektivi kryesor.
Skuadra e Franco Fodës e nisi me agresivitet dhe e mbylli pjesën e parë me 10 goditje drejt portës kundërshtare. Rasti më i pastër erdhi në fundin e këtij fraksioni, kur Lindrit Kamberi goditi traversën me kokë, duke qenë shumë pranë golit. Edon Zhegrova ishte gjithashtu ndër lojtarët më aktivë në sulm, ndërsa Milot Rashica provoi të rrezikonte portën e Izraelit. Nga ana tjetër, miqtë e testuan vetëm një herë portierin Amir Saipi gjatë 45 minutave të para.
Pjesa e dytë solli një tjetër zhvillim të pafavorshëm për Kosovën. Veldin Hoxha u ndëshkua me kartonin e dytë të verdhë në minutën e 67-të dhe la skuadrën me dhjetë lojtarë. Edhe në inferioritet numerik, dardanët tentuan të kërkonin golin, ndërsa Foda ndërhyri nga stoli duke aktivizuar Fisnik Asllanin dhe Baton Zabërgjën.
Megjithatë, rezultati nuk ndryshoi deri në vërshëllimën përfundimtare. Ky ishte barazimi i dytë pa gola mes Kosovës dhe Izraelit në këtë edicion, pasi edhe përballja e parë, e zhvilluar në Debrecen më 1 tetor, përfundoi 0-0.
Me këtë rezultat, Kosova shkon në kuotën e 6 pikëve, ndërsa Izraeli në 3. Dardanët mbeten në garë për vendin e dytë, por pozicioni përfundimtar në renditje varet edhe nga rezultati i sfidës Austri–Irlandë. Tashmë, gjithçka do të vendoset në transfertën e 17 nëntorit në Dublin, ku Kosova do të përballet me Irlandën. Një sfidë vendimtare për objektivin e përfundimit në vendin e dytë dhe sigurimin e një vendi në fazën play-off për ngjitjen në Ligën A.
Top Channel
