Fituesi i Kupës së Botës me Brazilin në vitin 1994 dhe aktualisht senator, Romario, ka shpërthyer në kritika ndaj Carlo Ancelottit pas humbjes së Seleção-s në miqësoren ndaj Japonisë. Ish-sulmuesi legjendar kërkon largimin e trajnerit italian, duke paralajmëruar se Brazili nuk mund të rrezikojë të dështojë edhe në një tjetër Kupë Bote.
Carlo Ancelotti po kalon një periudhë të vështirë në drejtimin e Brazilit. Kombëtarja amerikano-jugore u mposht 3-2 nga Japonia në një ndeshje miqësore, ndërsa tekniku italian u ndëshkua me karton të kuq për protesta pas golit të Sakamotos, të shënuar në minutat shtesë. Vetëm pak orë pas kësaj disfate, Romario reagoi ashpër, duke kërkuar largimin e tij.
Çfarë tha Romario?
Senatori brazilian nuk i kurseu aspak kritikat për trajnerin italian. “Ancelotti, mbaroi! Merr gjërat e tua dhe largohu! Askush nuk e vë në dyshim rekordin tënd. Je një nga trajnerët më të mëdhenj që ka njohur futbolli botëror, por këtë e ke dëshmuar në nivel klubesh. Me kombëtaren braziliane, deri më tani, nuk ke treguar se je i duhuri. Nuk mund ta tolerojmë më këtë situatë!”, deklaroi Romario. Kjo nuk është hera e parë që ish-sulmuesi i famshëm kërkon largimin e Ancelottit. Edhe në korrik, pas eliminimit të Brazilit nga Kupa e Botës, ai kishte bërë thirrje për shkarkimin e italianit, duke e cilësuar paraqitjen ndaj Norvegjisë si “një turp” dhe duke deklaruar se do ta ndërpriste menjëherë kontratën e tij.
Romario i drejtohet presidentit të Federatës
Romario i kërkoi presidentit të Federatës Braziliane të Futbollit, Samir Xaud, të marrë një vendim të guximshëm dhe të ndërhyjë për të ndryshuar situatën. “Samir, je i ri, je brazilian dhe besoj se dëshiron më të mirën për futbollin tonë. Por ka ardhur momenti të tregosh se ke guximin për të marrë një vendim. Largoje Ancelottin! Nuk mund të bëjmë shaka me fanellën e Seleção-s. Nuk mund të rrezikojmë të humbasim edhe një tjetër Kupë Bote. Momenti për të vepruar është tani”, u shpreh ai.
Megjithatë, pavarësisht kritikave, situata e Brazilit duhet parë edhe në kontekstin e ndeshjeve miqësore. Pas humbjes ndaj Norvegjisë në fazën e 1/16-ve të Kupës së Botës dhe barazimit me Australinë në shtator, disfata ndaj Japonisë ka shtuar presionin mbi Ancelottin. Nga ana tjetër, në një përballje të mëparshme me Japoninë, trajneri italian kishte arritur të përmbyste rezultatin në pjesën e dytë falë aktivizimit të Endrick dhe Martinellit.
Arsyet e shpërthimit të Romarios
I njohur për deklaratat e drejtpërdrejta, Romario shpjegoi edhe arsyet që e kanë çuar në këtë qëndrim të ashpër ndaj trajnerit italian. “Në futboll, ndonjëherë gjërat thjesht nuk shkojnë mirë. Por me Ancelottin, kjo nuk ka funksionuar aspak. Ai nuk e ka kuptuar dinamikën e punës me një kombëtare dhe, mbi të gjitha, nuk ka kuptuar se çfarë përfaqëson futbolli brazilian dhe fanella verdhejeshile. Ka kaluar mjaftueshëm kohë për të bërë një ndryshim. Mirupafshim!”, përfundoi Romario. Deklaratat e tij kanë ndezur debatin në Brazil, ndërsa e ardhmja e Ancelottit në stolin e Seleção-s mbetet në qendër të vëmendjes.
Top Channel
