Djali që frymëzoi Winnie-the-Pooh, por që vuajti nga fama e personazhit, njihuni me Christopher Robin

Me kalimin e viteve, ai nisi të ndiente pakënaqësi ndaj të atit, duke besuar se shkrimtari kishte shfrytëzuar fëmijërinë dhe identitetin e tij për të ndërtuar suksesin letrar.

Libri i parë “Winnie-the-Pooh” u botua në tetor të vitit 1926 dhe këtë vit shënon 100-vjetorin e publikimit. Personazhet e tij, të frymëzuar nga djali i autorit dhe lodrat prej pellushi me të cilat ai luante, u bënë të dashur për breza të tërë fëmijësh në mbarë botën.

Fillimisht, Christopher Milne ishte i emocionuar dhe krenar për suksesin e librave. Por, siç tregoi në një intervistë për emisionin “Desert Island Discs” të BBC-së në vitin 1976, kjo ndjenjë nisi të zbehej me kalimin e kohës.

Në kujtimet e tij të vitit 1974, të titulluara “The Enchanted Places”, ai shprehu pakënaqësinë për mënyrën se si i ati kishte përdorur përvojat e fëmijërisë së tij në krijimin e personazheve letrare.

Christopher shkroi se i dukej sikur babai i tij kishte arritur suksesin duke u mbështetur mbi fëmijërinë e të birit, duke i marrë identitetin dhe duke i lënë vetëm famën e të qenit djali i një shkrimtari të njohur.

Përtej famës, Christopher përshkroi edhe një fëmijëri larg asaj atmosfere të ngrohtë dhe të shkujdesur që paraqitej në librat e Winnie-the-Pooh. Në një intervistë për BBC-në në vitin 1971, ai tregoi se deri në moshën 10-vjeçare ishte rritur kryesisht nën kujdesin e dados.

Ai gjithashtu deklaroi se marrëdhënia me prindërit kishte qenë e largët gjatë viteve të para të jetës dhe se i shihte ata vetëm në momente të caktuara të ditës. Sipas tij, librat nuk ishin shkruar posaçërisht për të, por përfaqësonin botën krijuese të të atit.

Ndërkohë, AA Milne kishte një qëndrim tjetër për fëmijët dhe letërsinë. Në një bisedë të kujtuar nga Christopher, kur u pyet për dashurinë dhe mirëkuptimin që librat e tij shfaqnin ndaj fëmijëve, shkrimtari u përgjigj se nuk i donte shumë fëmijët dhe se nuk kishte ndier ndonjëherë sentimentalizëm të veçantë ndaj tyre.

I pyetur se si fama e librave mund të kishte ndikuar te djali i tij, AA Milne u shpreh se shpresonte që kjo të mos i kishte shkaktuar asnjë dëm.

Popullariteti i Winnie-the-Pooh vazhdoi të rritej ndër vite. Që nga viti 1966, personazhet u përshtatën në filma të animuar dhe prodhime të Disney-t, duke u kthyer në një prej franshizave më të njohura të industrisë së argëtimit.

Historia e marrëdhënies mes Christopher dhe të atit u trajtua edhe në filmin “Goodbye Christopher Robin”, të vitit 2017, i cili solli në vëmendje ndikimin e famës së librave në jetën private të familjes Milne.

Sot, një shekull pas botimit të librit të parë, Winnie-the-Pooh vazhdon të jetë një nga personazhet më të dashur të letërsisë për fëmijë. Megjithatë, historia e Christopher Milne tregon se pas suksesit të një vepre letrare mund të fshihet edhe një përvojë personale e vështirë për ata që frymëzuan krijimin e saj.

Top Channel