1000 jetët e Netanyahut, e quajnë “magjistari i tmerrshëm” për të gjetur aleatë

Me 85% të votave të numëruara, partia Likud e Netanyahut, së bashku me aleatët e saj të së djathtës ekstreme dhe partitë ultraortodokse hebraike, pritet të sigurojë 53 vende në Knessetin me 120 deputetë.

Ndërkohë, partia Yashar e Eisenkotit dhe tre parti të tjera hebraike të opozitës në bllokun e tij llogaritet të sigurojnë gjithsej 48 mandate. Të dy liderët kanë deklaruar se do të përpiqen të krijojnë një koalicion qeverisës për të siguruar shumicën parlamentare.

Një nga zhvillimet më të rëndësishme të zgjedhjeve është rezultati i pritshëm i partive të udhëhequra nga arabët, të cilat mund të sigurojnë gjithsej 19 mandate, një numër rekord, i cili mund t’u japë një rol vendimtar në formimin e qeverisë. Megjithatë, pothuajse të gjitha partitë hebraike kanë deklaruar se nuk do të bashkëpunojnë me to.

Pas konfirmimit të rezultateve, presidenti izraelit Isaac Herzog do të konsultohet me përfaqësuesit e të gjitha forcave politike dhe do t’i japë mandatin për formimin e qeverisë liderit që, sipas vlerësimit të tij, ka shanset më të mëdha për të siguruar shumicën.

Procesi mund të zgjasë disa javë. Nëse asnjë kandidat nuk arrin të formojë një koalicion qeverisës, Izraeli mund të detyrohet të mbajë zgjedhje të reja. E teksa Netanyahu mbetet në krye të garës, analistët janë përpjekur të kuptojnë arsyen e mbiejetesës së tij të re politike.

Sipas tyre, njofkën “Magjistari”, ai e ka marrë për shkak të aftësisë për të dalë nga krizat dhe për të ndërtuar aleanca politike, teksa është përpjekur të kontrollojë narrativën mbi dështimin e sigurisë së 7 tetorit 2023, dhe ndërsa kundërshtoi një hetim të plotë mbi ngjarjen, argumentoi se Izraeli ishte në luftë.

Aftësia për të kontrolluar mesazhin politik, për të negociuar dhe për të krijuar koalicione, duket se mbetet në qendër të strategjisë së tij për të qëndruar në pushtet.

Top Channel