Legjenda e Romës rrëfen momentet më të vështira të jetës në librin “Oltre”, nga lamtumira e dhimbshme me futbollin te humbja e të atit dhe marrëdhënia me fëmijët. Në skenë ndërhyn edhe Gasperini, të cilin Totti e falënderon për rikthimin e verdhekuqve në Champions League.
Francesco Totti ka zbuluar anën më personale dhe emocionale të jetës së tij gjatë prezantimit të autobiografisë së re, të titulluar “Oltre”. Në Teatrin Brancaccio, në Romë, përpara familjarëve, miqve dhe qindra tifozëve, ish-kapiteni legjendar i verdhekuqve ka ndarë kujtime të dhimbshme për të atin, mikun e tij Sinisha Mihajloviç dhe marrëdhënien me fëmijët. Gjatë mbrëmjes, Totti nuk i ka fshehur emocionet, duke shpërthyer në lot teksa kujtonte të atin, Enzo, ndërsa ka bërë edhe një apel të ndjerë për fëmijët e tij, Christian, Chanel dhe Isabel.
Lamtumira me futbollin mbetet një plagë e hapur
Totti e nisi rrëfimin duke u kthyer te momenti kur i dha fund karrierës së tij me Romën, një ndarje që, sipas tij, nuk ishte ashtu siç e kishte imagjinuar. “Jam i vdekur, në një farë mënyre. Ishte një lamtumirë e detyruar, të cilën nuk e doja dhe nuk e ndieja. E dija se një ditë do të vinte fundi, sepse gjithçka ka një fillim dhe një mbarim. Por për mua ishte shumë e dhimbshme. Nuk arrija të kuptoja çfarë po ndodhte dhe ndihesha i humbur”, rrëfeu ish-numri 10 i Romës. Ai pranoi se edhe sot mendon shpesh për vdekjen, një frikë që e shoqëron, sidomos pas humbjes së njerëzve të dashur. Mes tyre është edhe Sinisha Mihajloviç, mikun e të cilit thotë se e ndien ende pranë vetes.
Lotët për të atin: Do të paguaja flori që ta kisha pranë
Momenti më prekës i mbrëmjes erdhi kur Totti foli për të atin, Enzo, të cilin e konsideron njeriun që i dha bazat e gjithçkaje në jetë. “Ai ishte themeli i gjithçkaje. Pata fatin të rritesha me të. Më mësoi sjelljen, respektin dhe mënyrën se si duhet të sillesh me të moshuarit. Më përcolli vlera dhe gjëra pozitive. Kujdesej që të mos më mungonte asgjë, më donte, edhe pse nuk ma tregonte gjithmonë”, tha Totti mes emocionesh. Ish-kapiteni kujtoi edhe sakrificat që i ati bënte për të qenë pranë tij gjatë karrierës, duke udhëtuar për ditë të tëra për ta ndjekur në stërvitje. Për Tottin, largimi i të atit mbetet një dhimbje që është e vështirë të shpjegohet me fjalë. “Do të paguaja flori që ta kisha pranë meje dhe t’i thosha se e dua”, u shpreh ai, përpara se të shpërthente në lot.
Apeli për fëmijët: Shpresoj që një ditë ta kuptojnë të vërtetën. Një tjetër moment emocional ishte ai kur Totti foli për marrëdhënien me tre fëmijët e tij, Christian, Chanel dhe Isabel, të cilët ishin të pranishëm në sallë së bashku me Noemi Bocchi-n.
Ish-futbollisti pranoi se marrëdhëniet mes tyre nuk janë në gjendjen që ai do të dëshironte, por shprehu shpresën se koha do t’i ndihmojë të kuptojnë më mirë situatën. “Unë jam babai i tyre dhe duhet të respektohem si i tillë. Ata ndoshta nuk e dinë, ose bëjnë sikur nuk e dinë, sa shumë i dua dhe sa respekt kam për ta. Në të njëjtën kohë, do të doja që edhe ata të ma tregonin këtë”, u shpreh Totti. Ai pranoi se ndarja ka sjellë vështirësi dhe largësi në marrëdhënien me fëmijët, por këmbënguli se dëshiron të rindërtojë lidhjen që kishin dikur.
“Shpresoj që, ndërsa rriten, të kuptojnë se ku qëndron e vërteta. Ka pasur përplasje, mosmarrëveshje dhe ndarje që nuk i kam pranuar, por kam bërë sikur i kam pranuar. Kam një zemër, një mendje dhe shumë dashuri për ta”, deklaroi ish-kapiteni.
Totti shtoi se dëshiron të jetë më pranë fëmijëve dhe të kalojë më shumë kohë me ta, duke rikthyer marrëdhënien familjare që kishte përpara se të lindnin problemet. “Dua të jemi sërish një familje si më parë. Kanë ndodhur shumë gjëra dhe nuk mund të kthehemi pas, por duhet të kuptojmë se jeta ka ende shumë gjëra të bukura përpara. Do të doja t’i përjetoja ato së bashku me ta”, përfundoi ai. Gasperini surprizon Tottin: Faleminderit që na riktheve në Champions League!
Mbrëmja nuk mungoi as në momente më të lehta, kur nëpërmjet një lidhjeje direkte u shfaq trajneri i Romës, Gian Piero Gasperini, i cili u prit me duartrokitje nga të pranishmit. Totti e falënderoi trajnerin për rikthimin e verdhekuqve në skenën më të madhe të futbollit europian. “Faleminderit që na solle përsëri në Champions League. Na dhe mundësinë të përjetojmë sërish ato net magjike që Roma meriton. Ky klub meriton të jetë në atë skenë”, tha legjenda italiane. Gasperini vlerësoi atmosferën e krijuar nga tifozët e Romës, ndërsa shkëmbeu batuta me Tottin, duke iu referuar edhe polemikave të mëparshme. Ish-kapiteni la të kuptohej se mund të ishte i pranishëm në ndeshjen e ardhshme të skuadrës, nëse do të arrinte të siguronte bileta.
Në fund, kur u pyet për mundësinë e fitimit të titullit kampion, Totti preferoi të mos nxitohej: “Le të mendojmë për nesër”. Një përgjigje që përmblodhi edhe frymën e mbrëmjes: mes kujtimeve, dhimbjeve dhe shpresave, Francesco Totti tregoi se jeta e tij vazhdon përtej futbollit, pikërisht siç sugjeron titulli i autobiografisë së tij, “Oltre”.
Top Channel
