Florin Bratu u largua nga drejtimi i Partizanit pas humbjes në Derbin e Kryeqytetit me Tiranën duke i dhënë fund një eksperience aspak pozitive.
Nën drejtimin e tij, Të Kuqtë kanë grumbulluar vetëm 4 pikë në 6 ndeshje me Partizanin që është në vendin e parafundit të klasifikimit. Pas kësaj ka ardhur edhe reagimi i vetë Bratut që iu drejtua rrjeteve sociale për të dhënë mesazhin e tij.
‘Pas gati katër muajsh në krye të ekipit të Partizanit të Tiranës, kam vendosur, në marrëveshje të përbashkët me drejtuesit e klubit, t’i japim fund bashkëpunimit tonë. Ka qenë një periudhë intensive, me shumë punë, sfida dhe përgjegjësi, gjatë së cilës jam përpjekur çdo ditë të ndërtojmë një ekip konkurrues, me identitet të qartë dhe mentalitet fituesi-shkruante Florin Bratu në postimin e tij.
Trajneri rumun vuri në dukje gjithashtu se është i vetëdijshëm që në futboll gjykimi vjen nga rezultatet në fushën e lojës duke falenderuar drejtuesit e Partizanit për mundësinë që i dhanë.
‘Futbolli gjykohet nga rezultatet dhe, në një klub me traditën dhe ambiciet e Partizanit, pritshmëritë janë gjithmonë të larta. I kam kuptuar dhe respektuar ato që nga dita e parë. Megjithatë, jam i bindur se, përtej rezultateve, puna, përkushtimi dhe parimet mbi të cilat ndërtohet një ekip mbeten thelbësore. Falënderoj drejtuesit e klubit për besimin e dhënë, lojtarët për përpjekjet e tyre, kolegët e stafit për profesionalizmin dhe tifozët për pasionin e tyre.Largohem me kokën lart, me respekt për këtë klub dhe me bindjen se çdo përvojë të bën më të fortë dhe më të përgatitur për atë që të pret në vazhdim. Shumë suksese, Partizani i Tiranës-përfundon postimin e tij Florin Bratu.
Top Channel
