Ekzekutimi i dështuar në Tenesi/ Vonesa në mbërritjen e ndihmës mjekësore për Krista Pike, telefonata në 911 u konsiderua e rreme

Sipas regjistrimeve të siguruara nga Associated Press, telefonata e parë në numrin 911 u bë më 30 shtator, në orën 20:40, më shumë se një orë pas nisjes së procedurës së ekzekutimit me injeksion vdekjeprurës. Megjithatë, për shkak se telefonuesi nuk arriti të jepte kodin e kërkuar të verifikimit, autoritetet dyshuan se bëhej fjalë për një telefonatë të rreme.

Në orën 21:03, një dispeçer deklaroi se, sipas Departamentit të Komunikimeve të Emergjencave, telefonata ishte konsideruar e rreme dhe se nuk kërkohej ndihmë mjekësore në burgun Riverbend.

Vetëm në orën 21:11, autoritetet e burgut konfirmuan se incidenti ishte i vërtetë dhe lejuan ekipet e shpëtimit të hynin në kompleksin e sigurisë së lartë. Një ambulancë dhe automjete zjarrfikëse mbërritën në ndërtesën ku ndodhej Pike rreth orës 21:14.

Krista Pike ishte dënuar me vdekje për vrasjen në vitin 1995 të shoqes së saj të klasës, Colleen Schlemmer. Në kohën e krimit, ajo ishte vetëm 18 vjeçe.

Protokolli i ekzekutimit në Tenesi parashikon administrimin e një doze të dytë pentobarbitali në rast se doza e parë nuk shkakton vdekjen e të dënuarit. Megjithatë, rregullat nuk përcaktojnë qartë procedurën që duhet ndjekur në rast se personi mbijeton edhe pas dozës së dytë.

Sipas informacionit të bërë publik, Pike humbi ndjenjat dhe nuk po merrte frymë normalisht pas injeksioneve. Ajo u transportua në spital, ku qëndroi e intubuar për disa ditë.

Gjendja e saj shëndetësore ishte aq e rëndë, sa avokatët kishin shprehur shqetësimin se ajo mund të mos mbijetonte. Megjithatë, 50-vjeçarja rifitoi vetëdijen, nisi të fliste me vështirësi dhe arriti të ecte me ndihmë. Më pas, ajo u lirua nga spitali dhe u kthye në burgun e grave, ku kishte vuajtur dënimin për rreth 30 vjet.

Konfuzioni mbi situatën u pasqyrua edhe në telefonatat e tjera të bëra për të kërkuar ndihmë mjekësore.

Në orën 21:08, avokatja e Pike, Kelly Gleason, telefonoi shërbimet e emergjencës për të njoftuar se ekzekutimi kishte përfunduar sipas protokollit, por klientja e saj ishte ende gjallë dhe kishte nevojë për kujdes të menjëhershëm mjekësor.

Ajo theksoi se, sipas informacionit të fundit nga avokati i pranishëm gjatë procedurës, Pike vazhdonte të merrte frymë dhe se ndërhyrja mjekësore ishte e domosdoshme për t’i shpëtuar jetën.

Edhe pasi ekipet e shpëtimit hynë në burg, pasiguria vijoi. Në një komunikim radiofonik, një prej punonjësve kërkoi që administrata e burgut të informohej për spitalin ku po transportohej e burgosura, duke shprehur shqetësimin për konfuzionin e krijuar gjatë gjithë ngjarjes.

Departamenti i Korrektimeve në Tenesi nuk ka dhënë ende një shpjegim të plotë për dështimin e ekzekutimit. Ndërkohë, guvernatori i shtetit, Bill Lee, ka urdhëruar pezullimin e ekzekutimeve të ardhshme deri në përfundimin e hetimit.

Mbetet e paqartë nëse autoritetet do të tentojnë sërish ekzekutimin e Pike.

Ekspertët mjekësorë kanë ngritur disa hipoteza për mbijetesën e saj, përfshirë probleme të mundshme me cilësinë e substancës së përdorur ose vendosjen e gabuar të kateterëve intravenozë, gjë që mund të ketë penguar kalimin normal të ilaçit në qarkullimin e gjakut.

Përpara ekzekutimit, avokatët e Pike kishin paralajmëruar gjykatat dhe autoritetet e burgut se ajo vuante nga një çrregullim i gjakut që mund të shkaktonte formimin e mpiksjeve në vendet e injektimit.

Publikimi i regjistrimeve të telefonatave ka shtuar pikëpyetjet mbi mënyrën se si u menaxhua situata dhe mbi përgjegjësinë e autoriteteve për vonesën në ofrimin e ndihmës mjekësore.

Top Channel