Bayern Munich ka marrë vetëm një pikë në transfertën ndaj Viking, në një ndeshje spektakolare që përfundoi 3-3.
Bavarezët u rikthyen fuqishëm në lojë, por kartoni i kuq i Michael Olise dhe goli i pësuar në minutën e 90-të i mohuan fitoren skuadrës së Vincent Kompany.
Norvegjezët e nisën ndeshjen në mënyrë perfekte, duke kaluar në avantazh që në minutën e parë me Gianni Stensness, i cili shfrytëzoi një goditje nga këndi për të dërguar topin në rrjetë.
Viking vazhdoi të surprizonte dhe në minutën e 38-të Peter Christiansen realizoi golin e dytë, duke i çuar vendasit në pushim me avantazhin e dyfishtë.
Por Bayern kishte në dispozicion Harry Kane. Sulmuesi anglez shkurtoi diferencën në minutën e 55-të nga pika e bardhë e penalltisë, përpara se të realizonte sërish me kokë, duke barazuar shifrat dhe duke vazhduar serinë e golave në nëntë ndeshje radhazi në Champions League.
Përmbysja u kompletua në minutën e 69-të, kur Luis Díaz shënoi golin e tretë pas një aksioni të bukur të bavarezëve. Gjithçka dukej se po shkonte në favor të gjermanëve, por ndëshkimi me karton të kuq i Michael Olise ndryshoi rrjedhën e takimit.
Me një lojtar më shumë, Viking shtoi presionin dhe u shpërblye në minutën e 90-të, kur Herman Haugen realizoi me kokë pas krosimit të Zlatko Tripić, duke vulosur rezultatin përfundimtar 3-3.
Një barazim zhgënjyes për Bayern, që shpërdoroi avantazhin e krijuar pas një përmbysjeje të madhe, ndërsa Viking festoi pikën e parë në fazën e ligës.
Arsenali ka regjistruar një tjetër fitore bindëse në Champions League, duke mposhtur Lille me rezultatin 3-0 në “Emirates Stadium”.
Skuadra e Mikel Artetës e pati të vështirë të thyente mbrojtjen e francezëve në pjesën e parë, ndërsa Lille arriti të rezistonte dhe madje të krijonte disa momente të rrezikshme. Një gol i Ayase Ueda u anulua për pozicion jashtë loje në aksionin paraprak, duke i shpëtuar vendasit nga një surprizë e pakëndshme.
Megjithatë, Arsenali e rriti ritmin pas pushimit dhe gjeti golin e avantazhit në minutën e 64-t. Jurrien Timber përfitoi nga pasimi i Noni Maduekes dhe me një goditje elegante mbi portierin dërgoi topin në rrjetë.
Vetëm tre minuta më vonë, Eberechi Eze dyfishoi shifrat, duke finalizuar saktë krosimin e Bukayo Sakës, i cili sapo ishte futur në fushë.
Saka u kthye nga asistues në golashënues në minutën e 71-të, kur përfitoi nga pasimi i Kai Havertz dhe vulosi fitoren 3-0 të londinezëve.
Arsenali vazhdon kështu serinë e jashtëzakonshme në fazën e ligës së Champions League, duke konfirmuar ambiciet për të qenë mes pretendentëve kryesorë për trofeun.
RB Leipzig ka marrë një fitore të rëndësishme 1-0 ndaj PSV Eindhoven, falë një goli spektakolar të Brajan Grudës.
Ndeshja ishte e luftuar, me të dyja skuadrat që krijuan raste të shumta, ndërsa portierët u bënë protagonistë me pritjet e tyre. PSV pati mundësinë të kalonte në avantazh nga pika e bardhë e penalltisë, por Maarten Vandevoordt ndali goditjen e Ivan Perišić.
Kur gjithçka dukej se do të përfundonte pa gola, Gruda vendosi sfidën me një goditje të fuqishme me të majtën nga jashtë zonës, duke i dhuruar Leipzigut tri pikë të çmuara.
PSV tentoi të reagonte në minutat e fundit dhe arriti të dërgonte topin në rrjetë, por goli i Armando Obispos u anulua pas verifikimit për pozicion jashtë loje.
Rezultatet e mbrëmjes
Viking 3-3 Bayern Munich
Arsenal 3-0 Lille
RB Leipzig 1-0 PSV Eindhoven
Top Channel
