Ra në det nga kroçera në Zakinthos, shpëtohet pas 12 orësh turistja 44-vjeçare

Ngjarja ndodhi rreth 72 milje detare në veriperëndim të ishullit të Zakinthosit, në detin Jon. Gjatë natës së kaluar, kroçera me flamur të Bahamas, në të cilën udhëtonte 44-vjeçarja, dha sinjalin SOS pasi pasagjerja ra në det.

Menjëherë nisi operacioni i kërkim-shpëtimit, por, me rënien e natës, gjetja e turistes u bë tepër e vështirë, raporton korrespondenti i Top Channel Artur Bibe.

Pikërisht në orët e para të mëngjesit, pak para zbardhjes së ditës, Roja Bregdetare greke, në bashkëpunim me anijen e mallrave MSC Rozella, e cila po ndihmonte në kërkime, arriti ta gjente 44-vjeçaren të gjallë.

Në operacionin e kërkim-shpëtimit morën pjesë gjithashtu helikopterë dhe anije të tjera që lundronin në zonë.

Pas shpëtimit, gruaja u transportua në spital, pasi shfaqte shenja hipotermie, pas rreth 12 orësh të kaluara në ujërat e detit Jon. Ndërkohë, ka nisur një hetim për të zbardhur rrethanat në të cilat ajo ra në det.

Shpëtimi i saj, në errësirë të plotë dhe më shumë se 70 milje detare larg bregut, konsiderohet një rastësi e jashtëzakonshme dhe një sukses i operacionit të kërkim-shpëtimit.

44-vjeçarja deklaroi se do t’u ishte mirënjohëse gjatë gjithë jetës shpëtuesve që arritën ta nxirrnin të gjallë nga ujërat e detit Jon.

Top Channel