“Boll më”, Ukraina lodhet nga lufta? Thirrje për bisedime paqeje me Rusinë

Disa politikanë kërkojnë nisjen e bisedimeve të paqes, ndërsa të tjerë paralajmërojnë se lëshimet ndaj Moskës mund të rrezikojnë sovranitetin dhe sigurinë e vendit.

Deputeti Oleksij Honçarenko ka propozuar negociata për çështje si neutraliteti i Ukrainës, anëtarësimi në NATO, sanksionet dhe statusi i Donbasit.

Edhe Danilo Hetmancev, nga partia në pushtet, ka kërkuar që negociatat të bëhen përparësi, ndërsa kryetari i bashkisë së Harkivit, Ihor Terehov, thekson se çdo marrëveshje duhet të shoqërohet me garanci konkrete sigurie.

Presidenti Volodymyr Zelensky reagoi duke bërë thirrje për ruajtjen e unitetit kombëtar dhe duke paralajmëruar kundër lëshimeve që mund të dobësojnë Ukrainën.

Sipas politologëve ukrainas, këto deklarata mund të lidhen me lodhjen e popullsisë nga lufta, pritshmëritë për një dimër të vështirë dhe përpjekjet e disa politikanëve për të fituar mbështetje përpara zgjedhjeve të ardhshme. Ato mund të shërbejnë gjithashtu për të testuar reagimin e publikut ndaj kompromiseve të mundshme me Rusinë.

Sipas një sondazhi të Institutit Ndërkombëtar të Sociologjisë në Kiev, 75 për qind e ukrainasve mbështesin negociatat me Rusinë, ndërsa vetëm 21 për qind janë kundër.

Megjithatë, mbështetja për negociatat nuk do të thotë domosdoshmërisht se ukrainasit janë të gatshëm të pranojnë kushtet e Rusisë. Sfida kryesore mbetet arritja e një marrëveshjeje që ndalon luftimet pa cenuar sovranitetin dhe të ardhmen e vendit.

Top Channel