Mister rreth Cristiano Ronaldos para ndeshjes me Danimarkën, ylli portugez largohet nga stërvitja

Cristiano Ronaldo nuk mori pjesë në stërvitjen e përbashkët të skuadrës, vetëm pak ditë pasi e nisi nga stoli ndeshjen ndaj Norvegjisë.

Kapiteni portugez mbërriti në Eleda Stadion në Malmö, ku kombëtarja po zhvillonte seancën stërvitore, rreth 30 minuta para nisjes së saj. Megjithatë, Ronaldo nuk zbriti në fushë për t’u stërvitur me pjesën tjetër të ekipit.

Ashtu si dy lojtarët e tjerë të dëmtuar, João Félix dhe Francisco Conceição, sulmuesi iu nënshtrua një programi individual.

Sipas Federatës Portugeze të Futbollit, arsyeja lidhet me kushtet e stadiumit, pasi aty nuk ndodheshin pajisjet e nevojshme për të zhvilluar seancën e planifikuar nga Ronaldo.

Pas një bisede me trajnerin Jorge Jesus, Ronaldo u largua nga stadiumi i Malmö-s dhe u kthye në hotelin ku qëndron delegacioni portugez.

Sipas informacionit të publikuar nga federata, 40-vjeçari vijoi programin e tij stërvitor në palestrën e hotelit.

Megjithatë, FPF nuk ka bërë të ditur se çfarë përmbante konkretisht programi individual i Ronaldos dhe as nuk ka raportuar për një problem të ri fizik të kapitenit.

Situata ka shkaktuar vëmendje të veçantë edhe për shkak të faktit se Ronaldo u la në stol gjatë fitores së Portugalisë ndaj Norvegjisë.

Sipas A Bola, presidenti i Federatës Portugeze të Futbollit, Pedro Proença, është nisur drejt Kopenhagës për të sqaruar situatën rreth kapitenit të kombëtares.

Në fund të sfidës ndaj Norvegjisë, Ronaldo u duk i zhgënjyer nga qëndrimi në stol dhe u largua nga fusha pa përshëndetur tifozët, një veprim që shtoi diskutimet rreth marrëdhënies së tij me situatën aktuale në kombëtare.

Deri tani, Portugalia nuk ka dhënë ndonjë njoftim zyrtar për një dëmtim të Ronaldos. Mbetet për t’u parë nëse kapiteni do të jetë i gatshëm dhe në çfarë roli do të përdoret në përballjen e radhës ndaj Danimarkës në Kopenhagë.

Top Channel