Largim i bujshëm te Barcelona, drejtori i përgjithshëm Manel del Rio do të largohet nga klubi në fund të muajit

Lajmi është bërë fillimisht i ditur nga gazeta “Ara” dhe më pas është konfirmuar edhe nga “Mundo Deportivo”. Sipas raportimeve, Del Río ia ka komunikuar vendimin presidentit të Barcelonës, Joan Laporta, ndërsa këtë të hënë është përshëndetur me anëtarët e Komitetit Drejtues të klubit.

Burime pranë Barcelonës kanë bërë të ditur se largimi është dakordësuar mes të dyja palëve dhe klubi i ka njohur punën e bërë nga Del Río gjatë pesë viteve të tij në institucion.

Manel del Río ka mbajtur fillimisht postin e drejtorit financiar të Barcelonës, ndërsa në shtator të vitit 2025 mori detyrën e drejtorit të përgjithshëm. Ai u emërua në këtë pozicion pas më shumë se tre vitesh pa një CEO në strukturën drejtuese të klubit, pas largimit të Ferran Reverter.

Drejtori i përgjithshëm mbetet për momentin vakant

Barcelona nuk pritet ta zëvendësojë menjëherë Del Ríon në postin e drejtorit të përgjithshëm. Sipas burimeve të klubit, pozicioni do të mbetet vakant për momentin.

Ndërkohë, Sergio Serrano pritet të marrë drejtimin financiar të klubit, duke zëvendësuar Marcel Ramírez. Serrano vjen nga “Banco Sabadell”, ku ka punuar gjatë viteve më të vështira të krizës financiare dhe, sipas klubit, ka pasur një rol të rëndësishëm në menaxhimin e situatës. Ai do të jetë përgjegjës për drejtimin e fazës së re financiare të Barcelonës.

Largimi vjen në një moment të rëndësishëm për klubin

Del Río largohet nga Barcelona në një periudhë të rëndësishme për financat e klubit. Gjatë kohës së tij në drejtim, Barcelona ka arritur të rikthejë hapësirën e nevojshme në kuadër të rregullave të “fair-play” financiar të LaLigas.

Megjithatë, klubi katalanas vijon të ketë nevojë për financime të mëtejshme për përfundimin e projektit Espai Barça. Në Asamblenë e fundit, anëtarët delegatë miratuan kërkesën për një tjetër kredi prej 300 milionë eurosh, e cila do të përdoret për përfundimin e punimeve.

Largimi i Del Ríos vjen gjithashtu pak kohë pas situatës së krijuar me shitjen e biletave për ndeshjen Barcelona–Alavés, për të cilën drejtuesit e klubit u detyruan të jepnin shpjegime publike.

Tashmë, Barcelona hyn në një fazë të re në strukturën e saj drejtuese, me postin e drejtorit të përgjithshëm vakant dhe me Sergio Serranon që pritet të marrë përgjegjësinë për drejtimin financiar të klubit.

Top Channel