Alarm në Varshavë/ Helikopteri rus shkel hapësirën ajrore për 42 sekonda, avionë luftarakë ngrihen në ajër

Sipas autoriteteve në Varshavë, fluturimi i helikopterit u monitorua nga sistemet radarike të Forcave të Armatosura polake. Pas identifikimit të incidentit, avionë luftarakë polakë u ngritën menjëherë në ajër, ndërsa forcat tokësore dhe njësitë e tjera ushtarake u vendosën në gatishmëri.

“Fluturimi i mjetit ajror u monitorua nga sistemet radarike të Forcave të Armatosura polake”, thuhet në deklaratën e autoriteteve.

Komanda polake deklaroi gjithashtu se natyra e incidentit sugjeron, sipas vlerësimit të saj, se Rusia po teston sërish gatishmërinë e mbrojtjes ajrore të Polonisë.

Autoritetet polake theksuan se ekipet e sistemeve të mbrojtjes ajrore kryejnë mbikëqyrje 24 orë në ditë dhe qëndrojnë në gatishmëri të vazhdueshme për të garantuar sigurinë e hapësirës ajrore të vendit.

Ky nuk është incidenti i parë i këtij lloji. Sipas autoriteteve polake, shkelja e fundit e hapësirës ajrore nga një mjet rus u regjistrua më 30 korrik. Atë ditë, një raketë lundruese Kh-101 ra pranë Tarnawa-Kolonia, në vojevodatin e Lublinit.

Prokuroria e Lublinit deklaroi se raketa ishte prodhuar në një fabrikë në rajonin e Moskës. Në vendin e goditjes u krijua një krater me përmasa rreth 10 metra në diametër dhe 5 metra në thellësi.

Top Channel