Trajneri i Bjellorusisë, Viktor Gançarenko, ka analizuar kundërshtarët e grupit në Ligën e Kombeve, duke u ndalur veçanërisht te Shqipëria dhe te disa prej lojtarëve kryesorë të kuqezinjve.
Në prag të përballjes së 26 shtatorit në “Air Albania”, Gançarenko vlerëson repartin ofensiv të Shqipërisë dhe veçon Mirlind Dakun, ndërsa përmend edhe Kristjan Asllanin si një prej lojtarëve që udhëheq mesfushën.
“Nëse flasim për Shqipërinë, ata kanë një grup sulmues shumë të mirë. Për shembull, Daku, të cilin e njohim mirë, nuk është lojtari kyç te Spartaku siç ishte te Rubini”, u shpreh trajneri bjellorus. Gançarenko vijoi analizën e tij duke vënë në dukje edhe praninë e lojtarëve të tjerë të nivelit të lartë në përbërjen e kuqezinjve.
“Ne kemi një njësi sulmuese shumë të mirë. Qendërsulmuesi është njeriu kryesor. Ne kemi Asllanin në mesfushë, i cili udhëheq. Interi nuk rekruton vetëm lojtarë. Por, si çdo ekip, ne kemi pika të forta dhe të dobëta. Duhet të bëjmë gjithçka që mundemi për t’u mbrojtur mirë dhe për të sulmuar mirë në të njëjtën kohë”, deklaroi Gançarenko.
Trajneri i Bjellorusisë ka vlerësuar edhe Finlandën, duke e konsideruar një skuadër shumë të organizuar taktikisht dhe fizikisht. “Sa i përket ekipit kombëtar finlandez, gjithçka është shumë mirë e organizuar. Ekipi e di çfarë po bën në gjysmën e vet dhe në gjysmën e kundërshtarit. Ndërsa Shqipëria ka lojtarë nga Interi ose Lazio, finlandezët nuk i kanë të tillë. Megjithatë, ata janë një ekip i mirë në nivel evropian dhe lojtarët e tyre do të jenë të përgatitur mirë taktikisht dhe fizikisht”, tha ai.
Por Gançarenko ka dhënë edhe një mesazh për San Marinon. Sipas tij, skuadra që tradicionalisht konsiderohet si më e dobëta në grup nuk duhet nënvlerësuar. “Sa i përket San Marinos, ne e konsiderojmë atë një të dobët. Mund t’ju siguroj se tani nuk ka diçka të tillë”, deklaroi trajneri bjellorus. Ai argumentoi se San Marino ka fituar përvojë gjatë viteve, duke u përballur vazhdimisht me skuadra më të forta.
“San Marino ka pasur praktikë të mirë gjatë shumë sezoneve kundër ekipeve të ndryshme të forta. Në një mënyrë ose në një tjetër, ata po fitojnë përvojë, duke ditur si të mbrohen mirë, çfarë do të thotë të kalosh në ofensivë dhe çfarë është agresioni. Nuk mendoj se duhet të presim ndeshje të lehta”, u shpreh Gançarenko.
Për Shqipërinë, sfida e parë është pikërisht ndaj Bjellorusisë. Kuqezinjtë dhe skuadra e Gançarenkos përballen më 26 shtator, në orën 21:45, në “Air Albania”, në startin e Ligës së Kombeve.
Shqipëri–Bjellorusi do të transmetohet ekskluzivisht në DigitAlb, duke e bërë këtë një nga përballjet kryesore sportive të fundjavës për tifozët shqiptarë. Gançarenko ka deklaruar më herët se objektivi i Bjellorusisë është lufta për vendin e parë në grup, ndërsa për Shqipërinë kjo ndeshje është mundësia për ta nisur me fitore aventurën në Ligën e Kombeve.
Top Channel
