Pasi pranoi se kishte marrë një certifikatë të falsifikuar vaksinimi, Granit Xhaka mungoi në grumbullimin e kombëtares.
Disa orë më vonë, Peter Knäbel dha një intervistë për Blick dhe SRF , duke folur gjithashtu edhe për çështjen e shiritit të kapitenit.
Kur dhe si u informuat nga Granit Xhaka për certifikatën e tij të falsifikuar të vaksinimit?
Të dielën, Granit Xhaka më informoi se kishte marrë një certifikatë vaksinimi në vitin 2022 pa u vaksinuar vetë. Ai na tha gjithashtu se do ta bënte këtë publike të hënën dhe do të merrte përgjegjësi të plotë për të. Më pas vendosëm së bashku që ai ta anashkalonte këtë grumbullim, në mënyrë që skuadra të fokusohet plotësisht në fushatën e Ligës së Kombeve. Kjo ishte shumë e rëndësishme edhe për Granitin.
Sa të trazuara kanë qenë 72 orët e fundit për ju?
Ky është një rast i rëndësishëm për ne. Po flasim për lojtarin me numrin rekord të paraqitjeve me kombëtaren e Zvicrës. Ishte e rëndësishme për ne të dinim faktet. Graniti na i dha ato, po ashtu me qëllimin për të komunikuar qartë. Kjo na lejoi të përcaktojmë masat tona së bashku. Koha në të cilën ndodhi ishte tepër stresuese. Por të njohurit e njëri-tjetrit është gjithmonë një avantazh.
Si ju’u duk Granit Xhaka gjatë kësaj bisede?
Ai u duk reflektues dhe i qetë. Mendimet e tij ishin të qarta dhe ai e dinte se çfarë donte në atë moment. Biseda më preku, megjithatë ishte shumë e lehtë dhe e këndshme të flisje me të për këtë, duke përfshirë edhe pasojat e mundshme.
Si duket e ardhmja e Xhakës me kombëtaren?
Ne e mirëpresim faktin që ai mori përsipër këtë përgjegjësi. Pas grumbullimit të skuadrës, ne do të diskutojmë së bashku se si do t’i japim formë të ardhmes. Ne zgjodhëm qëllimisht këtë qasje për të mbajtur të hapura të gjitha opsionet. Në këto diskutime të hapura dhe të sinqerta, ne do të gjejmë një zgjidhje që funksionon për të gjithë.
A u diskutua ndonjëherë tërheqja e Granit Xhakës nga kombëtarja?
Jo.
A është Xhaka ende një opsion i vlefshëm për shiritin e kapitenit?
Sjellja e tij ka treguar se si duhet të reagojë një kapiten në një situatë të tillë. Për gjithçka tjetër do të diskutojmë më vonë. Megjithatë, kjo është hera e dytë që ai bëhet protagonist i titujve negativë jashtë fushës së lojës. Lojtarët me karakter dhe personalitet janë padyshim të mirëpritur këtu, veçanërisht ata me cilësi si Granit Xhaka. Natyrisht, dikush trupi i të cilit është vetë mjeti i tij i punës dhe jetesës, do të ketë shqetësime dhe do të përpiqet ta trajtojë atë me kujdes. Prandaj, unë mund t’i kuptoj mendimet dhe dyshimet e tij deri në njëfarë mase. Por unë nuk e shoh atë si një lojtar të padisiplinuar që vazhdimisht e kalon kufirin apo tërheq vëmendje negative.
Deri në çfarë mase mund të krahasohet rasti i Xhakës me certifikatën e falsifikuar të vaksinimit të Patrick Fischer?
Unë shoh ndryshime të mëdha mes këtyre rasteve. Granitit nuk i duhej certifikata e vaksinimit për të marrë pjesë në një turne madhor apo në ndeshje ndërkombëtare. Federata Zvicerane e Futbollit (SFV) lëshoi një rekomandim për vaksinim në atë kohë, jo një detyrim. Prandaj, është një rast krejtësisht i ndryshëm nga ai i Patrick Fischer.
Si ka reaguar skuadra ndaj këtij incidenti?
Nuk mund të them asgjë për këtë ende. Lojtarët sapo kanë mbërritur këtu në Belek. Sigurisht, ky incident është një temë diskutimi, por lojtarët janë ende të lumtur që janë mbledhur sërish së bashku për herë të parë që nga Kupa e Botës.
Top Channel
