Amedspor i Besnik Hasit po përjeton një nisje spektakolare të sezonit në Superligën turke. Skuadra nga Diyarbakiri mposhti 3-2 Besiktasin në një ndeshje dramatike dhe tashmë është ngjitur në krye të renditjes me 13 pikë pas gjashtë javësh.
Amedspor e nisi furishëm takimin dhe brenda 22 minutash ndërtoi një avantazh të dyfishtë. Gift Orban zhbllokoi rezultatin në minutën e 13-të, ndërsa Dia Saba shënoi për 2-0 në të 22-ën.
Besiktasi reagoi pas pushimit dhe ngushtoi diferencën në minutën e 55-të, por skuadra e Hasit reagoi menjëherë. Vetëm katër minuta më vonë, Furkan Soyalp përfitoi nga një gabim i mbrojtjes kundërshtare dhe realizoi për 3-1. Drama u rrit në minutën e 84-t, kur Amedspor mbeti me dhjetë lojtarë pas kartonit të kuq të Amadou Cisse. Besiktasi shtoi presionin dhe në minutën e 90+8-të Orkun Kökçü shënoi nga pika e bardhë, duke e çuar rezultatin në 3-2.
Minutat e fundit u kthyen në një provë nervash për Amedsporin, por skuadra e Hasit rezistoi dhe mori tri pikë me peshë të madhe. Në këtë sukses luajtën gjatë gjithë ndeshjes edhe shqiptarët Lumbardh Dellova dhe Ermal Krasniqi, ndërsa Milot Rashica u aktivizua në minutën e 71-të për Besiktasin.
Por drama nuk përfundoi me vërshëllimën e fundit.
Pas përfundimit të takimit pati tension mes Besnik Hasit dhe gjyqtarit kryesor Ali Şansalan. Sipas raportimeve të mediave turke, trajneri shqiptar iu afrua arbitrit dhe pati një debat të shkurtër me të, duke shprehur pakënaqësinë për mënyrën se si u menaxhuan minutat shtesë. Hasi besohet se ishte i bindur se loja u lejua të vazhdonte gjatë, në një moment kur Amedspor ishte me një lojtar më pak dhe Besiktasi po ushtronte presion të madh, duke arritur më pas edhe te penalltia që solli golin e dytë.
Përplasja mes Hasit dhe gjyqtarit, e filmuar pas ndeshjes, i shtoi edhe më shumë dramë një triumfi që tashmë po bën jehonë në futbollin turk. Me 15 gola të shënuar në gjashtë javë dhe 13 pikë në tabelë, Amedspor po shijon një start mbresëlënës nën drejtimin e Besnik Hasit, ndërsa fitorja ndaj një emri të madh si Besiktasi i jep edhe më shumë peshë këtij fillimi sezoni.
Kliko këtu për të parë shpërthimin e Besnik Hasit ndaj arbitrit
Top Channel
