Ka data që mbeten në kujtesën e një kombi jo vetëm për atë që ndodh në fushën e sportit, por edhe për historitë njerëzore që shkruhen jashtë saj. 4 shtatori 2004 është një prej tyre.
Atë mbrëmje, në stadiumin “Qemal Stafa”, Shqipëria përballej me Greqinë në ndeshjen e parë të kualifikueseve për Kupën e Botës 2006. Përballë kuqezinjve ishte pikërisht skuadra që vetëm pak javë më parë kishte tronditur Europën, duke u shpallur kampione e kontinentit në Portugali.
Por në Tiranë, historia do të merrte një tjetër rrjedhë.
Shqipëria, e drejtuar nga trajneri gjerman Hans-Peter Briegel fitoi 2-1, duke regjistruar një prej triumfeve më të bujshme të historisë së futbollit shqiptar. Ervin Murati shënoi golin e parë, ndërsa Adrian Aliaj dyfishoi avantazhin me një goditje spektakolare, ikonike, në mendjen e çdokujt që ishte dëshmitar i asaj mrekullie.
Për Greqinë shënoi Janakopulos, por goli nuk mjaftoi për të ndryshuar fatin e ndeshjes. Ishte një fitore me peshë të veçantë. Shqipëria sapo kishte mposhtur kampionët e Europës në ndeshjen e tyre të parë pas triumfit në “Euro 2004”. Stadiumi shpërtheu në festë dhe, pas vërshëllimës së fundit, atmosfera u zhvendos në rrugët e Tiranës.
Flamuj kuqezi, makina të zbukuruara me simbolet kombëtare dhe turma tifozësh mbushën rrugët. Ish-kryeministri Fatos Nano dha një premio që edhe sot do të lakmohej nga Kombëtarja, 500 mijë dollarë. Për shumë shqiptarë, ajo nuk ishte thjesht një fitore futbolli. Ishte një prej atyre netëve kur një rezultat sportiv shndërrohet në kujtim kolektiv.
Por në të njëjtën natë, festimet do të merrnin një kthesë tragjike.
Në ishullin Zakynthos, në zonën e Tsilivit, ndodhej edhe Gramoz Palushi, një 20-vjeçar shqiptar. Ai po festonte fitoren e kombëtares shqiptare kur u përfshi në një konflikt me persona të tjerë.
Sipas raportimeve të kohës, Palushi u godit me thikë dhe humbi jetën pas sulmit. Ngjarja ndodhi më 4 shtator 2004, në të njëjtën ditë kur Shqipëria mposhti Greqinë në Tiranë.
Vrasja tronditi opinionin publik në Shqipëri dhe Greqi. Emri i të riut shqiptar u lidh përgjithmonë me atë natë, e cila për mijëra tifozë kishte nisur si një festë historike, por për familjen e Palushit u shndërrua në një tragjedi të pakthyeshme.
Ngjarja solli reagime të forta dhe u kthye në simbol të anës së errët që mund të marrë rivaliteti sportiv kur përzihet me dhunën, tensionet nacionaliste dhe urrejtjen.
Sot, 22 vite më pas, 4 shtatori 2004 vazhdon të mbetet një datë e veçantë në kujtesën sportive shqiptare.
Nga njëra anë qëndron fitorja 2-1 ndaj Greqisë, një prej rezultateve më të rëndësishme të kuqezinjve, ndaj një skuadre që vetëm pak javë më parë ishte shpallur kampione e Europës. Nga ana tjetër është historia e Gramoz Palushit, 20-vjeçarit shqiptar që humbi jetën teksa festonte atë fitore.
Top Channel
