Kaos në Pentagon për shkak të zgjedhjeve të Hegseth/ Gjeneralët japin dorëheqjen, ai bllokon dronët për arsye personale, por Trump e mbështet atë

Sipas Financial Times, Driscoll ia paraqiti dorëheqjen Presidentit Donald Trump të hënën dhe pritet të largohet nga detyra të mërkurën. Një person i njohur me qëndrimet e tij tha se Driscoll besonte se ndërhyrjet e Hegseth po i shkaktonin “dëm brezash” Ushtrisë amerikane.

“Është një moment zbulues dhe mendoj se tregon se Pentagoni është në rrëmujë”, tha Tom Wright, bashkëpunëtor i lartë në Institutin Brookings.

Një nga burimet kryesore të tensionit mes Driscoll dhe Hegseth ishte shkarkimi i Shefit të Shtabit të Ushtrisë, gjeneralit Randy George, në prill.

Që prej fillimit të mandatit të dytë të Trumpit, Hegseth ka shkarkuar ose ka nxitur largimin e disa gjeneralëve dhe admiralëve, në kuadër të një riorganizimi të gjerë të udhëheqjes ushtarake.

Me largimin e Driscoll, Ushtria amerikane mbetet pa një drejtues civil të përhershëm dhe pa një komandant të përhershëm, dy poste që kërkojnë konfirmimin e Senatit.

Boshllëku vjen në një moment veçanërisht delikat, pasi Ushtria ka rol të rëndësishëm në mbrojtjen raketore përmes sistemeve Patriot dhe THAAD, ndërsa mijëra trupa amerikane janë dislokuar për periudha të gjata në Lindjen e Mesme.

Christopher Meger, ish-zyrtar i lartë i Pentagonit gjatë administratës Biden, e përshkroi Driscoll si një nga zyrtarët e paktë të lartë civilë që gëzonin besimin e trupave dhe që “bënë një punë vërtet të kënaqshme”.

Mosmarrëveshjet mes dy zyrtarëve nuk lidhen vetëm me drejtimin e Ushtrisë. Driscoll ishte bërë një nga figurat kryesore në përpjekjet për zhvillimin e dronëve më të lirë, teknologjive kundër dronëve dhe sistemeve të reja të mbrojtjes nga raketat.

Sipas një burimi të njohur me qëndrimet e tij, Driscoll besonte se Hegseth po përpiqej të pengonte procesin e modernizimit për arsye personale.

Nën drejtimin e Driscoll, Ushtria i kishte ngarkuar një batalioni këmbësorie zhvillimin dhe integrimin e aftësive të reja të dronëve. Megjithatë, Hegseth urdhëroi më pas shpërbërjen e njësisë.

Driscoll ishte konsideruar gjithashtu si një pasardhës i mundshëm i Hegseth në rast se Trump do të vendoste ta shkarkonte sekretarin e Mbrojtjes.

Dorëheqja ka shkaktuar shqetësim edhe brenda Partisë Republikane. Senatori Mike Rounds tha se ishte “i zhgënjyer” nga largimi i Driscoll.

“Ku është lidershipi? Kishim disa gjeneralë shumë të mirë që nuk janë më aty dhe të cilët i respektonim”, tha ai.

Hegseth ka emëruar gjeneral-lejtnant Christopher LaNeve si komandant në detyrë të Ushtrisë dhe po kërkon që ai të marrë postin në mënyrë të përhershme. Megjithatë, disa senatorë republikanë kanë sinjalizuar se konfirmimi i tij mund të jetë i vështirë, për shkak të pakënaqësisë për mënyrën se si u shkarkua gjenerali George.

Dorëheqja e Driscoll pritet gjithashtu të komplikojë përpjekjet e Pentagonit për miratimin e një buxheti prej 1.5 trilionë dollarësh dhe fondeve shtesë për luftën me Iranin.

Problemet nuk kufizohen vetëm te Ushtria. Edhe Marina amerikane po përballet me presione të mëdha operacionale dhe financiare, ndërsa operacionet nga Karaibet deri në Iran kanë rritur përdorimin e anijeve luftarake dhe kanë konsumuar rezervat e raketave.

Sekretari i Marinës, John Phelan, u shkarkua në prill, ndërsa Trump emëroi Hung Kao si sekretar në detyrë.

Senatorja demokrate Jeanne Shaheen kritikoi drejtpërdrejt Hegseth, duke thënë se ai duhet të japë dorëheqjen për shkak të mënyrës se si po menaxhohen operacionet ushtarake në Lindjen e Mesme dhe në pjesë të tjera të botës.

Pavarësisht kritikave nga brenda Pentagonit dhe Kongresit, Donald Trump vazhdon të mbështesë publikisht Pete Hegseth.

I pyetur për mundësinë që Hegseth të kandidojë për Shtëpinë e Bardhë në vitin 2028, Trump e vlerësoi atë.

“Ai ka bërë një punë të shkëlqyer”, tha presidenti amerikan, duke shtuar se Hegseth aktualisht është i përqendruar te Ushtria.

Ndërkohë, senatori demokrat Elisha Slotkin e akuzoi Hegseth se vepron duke pasur si “audiencë prej një personi” vetëm Donald Trumpin. Sipas tij, kushdo që nuk pajtohet me sekretarin ose e bën atë të duket i dobët, largohet nga detyra.

Vetë Driscoll nuk e sulmoi publikisht Hegseth në deklaratën e dorëheqjes. Ai falënderoi administratën dhe tha se kishte pasur “privilegjin” të punonte për modernizimin e Ushtrisë, duke shtuar se përparimi i bërë nuk do të ishte i mundur “pa mbështetjen e Sekretarit Hegseth”.

Top Channel