Largimi i Lionel Messit nga kombëtarja argjentinase hap jo vetëm një kapitull të ri për “Albiceleste”, por edhe një debat të madh rreth fanellës legjendare me numrin 10.
Shoqata Argjentinase e Futbollit (AFA) dëshiron që numri i lidhur me Messin të mos vishet më nga asnjë futbollist në të ardhmen. Ideja është që “10-ta” të mbetet përgjithmonë e lidhur me kapitenin që udhëhoqi Argjentinën drejt triumfit në Kupën e Botës. Por ekziston një problem: FIFA nuk lejon që numrat e fanellave të tërhiqen përgjithmonë në kompeticionet e saj.
Presidenti i AFA-së, Claudio Tapia, e kishte bërë publik këtë qëllim që në vitin 2024. “Numri 10 i ekipit kombëtar do të dalë në pension kur Leo të përfundojë karrierën e tij ndërkombëtare”, deklaroi Tapia në atë kohë.
Në praktikë, megjithatë, dëshira e federatës argjentinase bie ndesh me rregulloret e FIFA-s. Në Kupën e Botës, për shembull, numrat e fanellave duhet t’u caktohen lojtarëve sipas një renditjeje të përcaktuar. Në një skuadër me 26 futbollistë, përdoren numrat nga 1 deri në 26, duke e bërë të pamundur lënien bosh të numrit 10.
Kështu, pavarësisht dëshirës për ta kthyer “10”-ën e Messit në një simbol të përjetshëm, Argjentina mund të detyrohet t’ia japë sërish një futbollisti tjetër. Dhe këtu nis dilema tjetër e madhe: kush do të ketë guximin të veshë fanellën që për dekada ka qenë sinonim i Maradonës dhe Messit?
Në listën e kandidatëve potencialë për të marrë këtë numër përmenden emra si Nico Paz, Alexis Mac Allister, Enzo Fernández dhe Thiago Almada. Megjithatë, asnjëri prej tyre nuk duket se e ka fituar ende statusin për të qenë pasardhësi i padiskutueshëm i Messit. “10”-ta e Argjentinës ka kaluar nga një legjendë te tjetra. Tani, pas epokës së Messit, kombëtarja përballet me një nga pyetjet më të vështira: kush do ta mbajë mbi shpinë numrin që për dy breza është kthyer në mit?
Top Channel
