Video/ Mister me një ishull fantazmë në Kanada që u shfaq dhe papritmas… u zhduk

Autoritetet e BC Hydro, kompanisë shtetërore që menaxhon rezervuarin dhe digën pranë tij, kanë arritur tashmë të përcaktojnë vendndodhjen e ishullit. Sipas një zëdhënësi të kompanisë, Bob Gammer, ishulli ndodhet rreth 32 kilometra në veriperëndim të vendit ku ishte parë për herë të fundit.

Lajmi për ishullin u bë i njohur pasi një video e filmuar nga një lundërtar u publikua në rrjetet sociale gjatë muajit gusht. Në pamje dukej një sipërfaqe e gjelbër dhe e pyllëzuar që lundronte në mes të rezervuarit.

Në fillim, Gammer dyshoi se pamjet mund të ishin të krijuara me inteligjencë artificiale. Megjithatë, një inxhinier i BC Hydro kontrolloi imazhet satelitore dhe konfirmoi se ishulli ishte real.

Imazhet e marra më 21 korrik treguan një sipërfaqe rreth 138 metra të gjatë dhe 69 metra të gjerë. Në imazhet e mëvonshme, ai nuk shfaqej më në të njëjtin pozicion.

An island mysteriously appeared and then vanished on Canada’s Williston Lake

It appeared on July 21, and then by August 5 was not on satellite data pic.twitter.com/QjJRmmc7BL

— Interesting AF (@interesting_aIl) August 30, 2026

Sipas Gammer, shpjegimi më i mundshëm lidhet me trungje dhe mbetje drusore që janë grumbulluar ndër vite në zona të mbrojtura pranë brigjeve të liqenit. Me kalimin e kohës, mbi këtë masë mund të jetë krijuar bimësi dhe pemë, duke formuar një strukturë të madhe lundruese.

Niveli i ujit në Liqenin Williston është aktualisht më i lartë se në çdo periudhë tjetër gjatë 14 viteve të fundit. Sipas autoriteteve, kjo mund të ketë ndihmuar në shkëputjen e masës së drurit dhe bimësisë nga bregu.

Erërat më pas mund ta kenë shtyrë ishullin drejt ujërave të hapura, duke bërë që ai të zhvendosej në një zonë tjetër të rezervuarit.

Liqeni Williston është rezervuari i shtatë më i madh artificial në botë për nga vëllimi dhe liqeni më i madh me ujë të ëmbël në Kolumbinë Britanike. Ai mbulon një sipërfaqe prej rreth 2,700 kilometrash katrorë që prej mbushjes së tij në vitin 1972.

Misteri u bë edhe më interesant pasi ishulli nuk u pa më në vendin fillestar. Tashmë, megjithatë, autoritetet kanë një ide më të qartë se ku ndodhet.

BC Hydro ka deklaruar se ishulli nuk përbën rrezik për digën WAC Bennett dhe se lundërtarët janë të paralajmëruar për rreziqet që mund të shkaktojnë trungjet dhe mbetjet që lëvizin në ujë.

Megjithatë, mbetet ende pyetja se si një masë lundruese me përmasa kaq të mëdha dhe e mbuluar me bimësi mund të shkëputej nga bregu dhe të udhëtonte dhjetëra kilometra nëpër rezervuar.

Top Channel