“La Masia” vijon të prodhojë lojtarë klasi te Barcelona, Espart është talenti i radhës që përgatitet të “pushtojë” botën

Pasi fitoi betejën me Hèctor Fort gjatë fazës përgatitore, Espart duket se tani është i vendosur të bëhet një lojtar i rëndësishëm për Flick këtë sezon. Për momentin, ai ka parakaluar Balde në krahun e majtë dhe, për ndeshjen e dytë radhazi, luajti në atë pozicion.

Por Espart shkon shumë më larg sesa thjesht të mbulojë një pozicion që nuk është ai natyrali për të. Ai është inteligjenca në shërbim të Flick. Zotëron teknikën, por edhe taktikën. Di të zgjedhë momentin e duhur. I ka të gjitha për të pasur sukses.

Hansi Flick përgëzon Espart pas ndeshjes ndaj Athletic. Pavarësisht moshës së tij të re, ai pati zgjuarsinë e nevojshme për të korrigjuar një gabim të Gerard Martín, duke bërë një faull taktik që i kushtoi një karton të verdhë, por që i prishi Iñaki Ëilliams një tentativë për goditje.

Për më tepër, edhe pse pozicioni i tij ishte ai i mbrojtësit të krahut, ai nuk pati probleme për t’iu bashkuar sulmit, qoftë duke vepruar si anësor nga jashtë, qoftë duke u futur në qendër si mesfushor.

Nga këmbët e tij erdhi një pasim mjeshtëror drejt Raphinha, i cili goditi topin me kokë dhe e përplasi atë në bazën e shtyllës. Gjithçka e bëri mirë.

Xavi Espart gjatë një tjetër aksioni ndaj Athletic, në ditën kur debutoi me fanellën me numrin 12.

Por Espart nuk u mjaftua vetëm me rolin e mbrojtësit dhe pasuesit. Ai guxoi edhe të kërkonte portën kundërshtare. Futbollisti nga Barcelona vuri në provë Unai Simón në minutën e 59-të, pas një pasimi të Lamine Yamal.

Duke parë Espart në fushë, do të mendoje se talenti i akademisë ka shumë kohë që luan në ekipin e parë. Kjo është ajo që të jep rritja në La Masia, ku ai u bashkua kur ishte vetëm disa vjeç, në moshën e benjaminit të vitit të parë, pasi vinte nga Vilassar.

Më 10 mars, ai përmbushi ëndrrën e tij duke debutuar me Barçën në Champions League, ndaj Neëcastle. Por, duke parë atë që tregoi dje, Espart duket se ka ardhur për të qëndruar.

Top Channel