5.3 milionë dollarë për të kaluar më shpejt Kanalin e Panamasë, anija vendos një rekord të ri

Shuma rekord u pagua nga kompania koreano-jugore SK Gas, e cila, sipas Bloomberg, fitoi një ankand për t’i siguruar anijes së saj G. Spirit kalimin në kanal më 1 shtator.

Administratori i Autoritetit të Kanalit të Panamasë, Illia Espino de Marotta, konfirmoi se bëhet fjalë për shumën më të lartë të paguar ndonjëherë në një ankand të tillë.

“Kohët e fundit kemi mbajtur tre ankande mjaft të larta”, deklaroi Espino de Marotta, duke shtuar se pagesa prej 5.3 milionë dollarësh është “shuma më e lartë” e regjistruar deri më tani.

Rritja e çmimeve të ankandeve vjen në një kohë kur Autoriteti i Kanalit të Panamasë ka njoftuar reduktimin e numrit të anijeve që mund të kalojnë çdo ditë, për shkak të rënies së niveleve të ujit të shkaktuar nga fenomeni El Niño.

Kanali funksionon falë ujit të shiut të mbledhur në liqenet artificiale Gatun dhe Alajuela, por nivelet e tyre kanë rënë ndjeshëm, duke kufizuar kapacitetin e tranzitit.

Sipas planit të autoriteteve, duke nisur nga 3 shtatori, numri i kalimeve ditore do të ulet nga 36 në 34 anije. Më pas, nga 15 shtatori, numri i tranziteve do të reduktohet më tej, në 32 anije në ditë.

I gjatë rreth 80 kilometra, Kanali i Panamasë është një nga nyjet më të rëndësishme të tregtisë globale dhe përmes tij kalon rreth 5% e tregtisë detare botërore.

Rreth 9 në 10 kalime në kanal bëhen përmes rezervimeve të paracaktuara. Vendet e mbetura, si dhe hapësirat që krijohen për shkak të ndryshimeve të papritura në orare, nxirren në ankand.

Çmimet e këtyre ankandeve janë rritur ndjeshëm muajt e fundit. Në prill, një anije pagoi rreth 4 milionë dollarë për të siguruar kalimin, pasi kërkesa për transportin e hidrokarbureve u rrit në një kohë kur trafiku detar u ndikua nga bllokada e Ngushticës së Hormuzit.

Sipas Espino de Marotta, çmimi i ankandit përcaktohet nga tregu. Autoriteti vendos një çmim minimal dhe më pas kompanitë konkurrojnë për të siguruar një nga hapësirat e kufizuara për kalim.

Të dhënat e Autoritetit të Kanalit të Panamasë tregojnë se mes tetorit 2025 dhe shkurtit 2026, çmimi mesatar i një vendi të fituar përmes ankandit ishte rreth 55 mijë dollarë. Që atëherë, kjo shumë është rritur rreth trefish, ndërsa pagesa prej 5.3 milionë dollarësh përbën një rekord të ri.

Top Channel