Zelensky hedh poshtë akuzat për sabotimin e Nord Stream pas hetimeve gjermane: Ukraina nuk ka dorë në atë sulm

Prokurorët gjermanë arritën në përfundimin muajin e kaluar se shpërthimet në tubacione u shkaktuan me urdhër të shtetit ukrainas, një akuzë që ka të ngjarë të ndërlikojë marrëdhëniet midis Kievit dhe Gjermanisë, një nga mbështetësit e saj kryesorë ushtarakë.

“Ukraina nuk ka marrë kurrë pjesë zyrtarisht në ndonjë operacion të lidhur me sabotimin e Nord Stream”, u tha Zelensky gazetarëve sot, kur u pyet për hetimin e çështjes.

Kreu i shtetit ukrainas, i cili gjithmonë ka mohuar çdo përfshirje nga vendi i tij, shtoi se Gjermania “është plotësisht e vetëdijshme për faktin se Ukraina nuk e organizoi, kreu dhe as nuk e shpiku këtë operacion”.

Ai sqaroi se Kievi po i ofron Berlinit ndihmën e saj në këto hetime dhe shpreson se ato nuk do të dëmtojnë marrëdhëniet e tyre.

“Është shumë e rëndësishme për ne të mos humbasim partneritetin tonë, të mos humbasim besimin e vendeve evropiane që kanë ndihmuar Ukrainën që nga fillimi i kësaj lufte kundër Rusisë”, tha Zelensky.

Të mërkurën, një shtetas ukrainas u arrestua në Kroaci me dyshimin për përfshirje në sabotimin e gazsjellësit.

Siç u bë e ditur, ai po punonte në një film kushtuar këtij sulmi.

Sipas prokurorisë gjermane, ky burrë kishte bashkëpunuar me një tjetër ukrainas, i cili u arrestua vitin e kaluar në Itali dhe më pas u ekstradua në Gjermani.

Top Channel