Franca përshpejton dërgimin e pajisjeve ushtarake në Ukrainë, Zelensky: Ramë dakord për raketat franceze, faleminderit për gatishmërinë

Zelensky tha se biseda me Macron zgjati rreth dy orë dhe se presidenti francez shprehu gatishmërinë për të ndërmjetësuar me aleatët që kanë rezerva të raketave interceptuese Patriot.

Sistemet Patriot konsiderohen ndër sistemet kryesore të afta për të përballuar raketat balistike të përdorura nga Rusia në luftën kundër Ukrainës. Ndërsa Moska ka intensifikuar sulmet, Kievi u ka bërë vazhdimisht thirrje aleatëve për më shumë raketa për mbrojtjen ajrore.

“Ne ramë dakord të përshpejtojmë dorëzimin e pajisjeve dhe raketave franceze”, shkroi Zelensky në Telegram, pa dhënë detaje të mëtejshme. “Faleminderit që konfirmuat gatishmërinë tuaj për të dhënë licenca për prodhimin e raketave.”

Ukraina është gjithashtu në pritje të sistemit të ri italo-francez të mbrojtjes ajrore SAMP/T-NG, i cili pritet të ketë aftësi për të rrëzuar raketa balistike, megjithëse ende nuk është testuar në luftime. Diplomatët evropianë kanë thënë se sistemi nuk pritet të mbërrijë në Ukrainë para pranverës së vitit të ardhshëm.

Macron i shprehu Zelenskyt “tmerrin dhe emocionin e tij të thellë” për sulmin rus në një qendër tregtare në Kryvyi Rih, qyteti i lindjes së presidentit ukrainas, ku u vranë të paktën 16 persona dhe u plagosën më shumë se 130 të tjerë.

“Duke synuar sistematikisht civilët dhe duke zgjedhur frikësimin dhe përshkallëzimin, Rusia po përpiqet të demonstrojë forcë, por mbi të gjitha po zbulon dobësinë e saj”, tha Macron.

Zelensky tha se gjatë bisedës u diskutua edhe për gjendjen e negociatave të paqes dhe kontaktet me Shtetet e Bashkuara.

“Ne ramë dakord për hapat që mund të hapin mundësi shtesë diplomatike”, tha ai.

Top Channel